Kishin dalë për të rikthyer energjinë, dy elektriçistë në Gjirokastër mbyten në lumin Drino

Ngjarje tragjike në Gjirokastër. Dy elektriçistë, punonjës të OSHEE humbën jetën në ujërat e lumit Drino teksa ishin në krye të detyrës. Selfo Kallfa 52 vjeç dhe Ismet Isaraj 64 vjeç kishin dalë për monitorimin e një defekti në rrjetin shpërndarës, por makinën me të cilën udhëtonin e mori rrjedhja e ujit teksa tentuan të kalojnë mes lumit. Trupat e pajetë u nxorrën këtë mëngjes nga forcat RENEA.

Dy elektriçistë humbën jetën në ujërat e lumit Drino në Gjirokastër ndërsa po shkonin të riparonin një defekt në linjat e energjisë elektrike.

Viktima të ngjarjes tragjike mbetën Selfo Kallfa 52 vjeç dhe Ismet Isaraj 64 vjeç.

Ata ishin nisur gjatë natës drejt fshatit Asim Zeneli, ku ishte konstatuar një defekt dhe kanë tentuar që të kalojnë me makinën e punës përmes lumit për të dalë në anën tjetër.

Por rrjedhja e fortë e ka marrë mjetin dhe i ka bllokuar dy burrat mes ujit.

Ngjarja u shënua rreth 30 minuta pas mesnate.

Një prej tyre ka arritur të japë alarmin dhe ka ngritur në këmbë policinë, zjarrfikësen e autoritetet e tjera lokale.

Por kur ata mbërritën ishte shumë vonë. Punonjësit e OSHEE kishin humbur jetën brenda mjetit, ku dyshohet se u mbytën.

Deri në orët e para të mëngjesit pati tentativa për të nxjerrë trupat e pajetë, por ishte e pamundur për shkak të thellësisë së lumit dhe temperaturave të ulta.

Trupat e pajetë të elektriçistëve Selfo Kallfa dhe Ismet Isaraj u arrit të nxirren vetëm rreth orës 09:00 të mëngjesit, pas mbërritjes së polumbarëve të forcave RENEA.

Policia e Prokuroria e Gjirokastrës thonë se kanë nisur një hetim për sqarimin e rrethanave të ngjarjes ku dy punonjësit e OSHEE humbën jetën në krye të detyrës.

Njoftimi i policisë për ngjarjen

Rreth orës 00:30, në shtratin e lumit Drino, një automjet të OSHEE-së, në përpjekje për të kaluar lumin, e ka marrë rrjedha e lumit dhe për pasojë kanë humbur jetën dy elektricistët që ndodheshin në mjet, shtetasit I. I., 64 vjeç dhe S. K., 52 vjeç banues në Gjirokastër.

Trupat e të dy shtetasve u nxorën nga polumbarët e RENEA-s. Grupi hetimor ndodhet në vendngjarje dhe po punon për zbardhjen e plotë të rrethanave të ngjarjes.

Vendi Lajme Lajmi i fundit aksident gjirokaster Aktualitet