Weber: Ukraina ka nevojë për municion sa më shpejt të jetë e mundur

Ukraina ka nevojë për municion sa më shpejt të jetë e mundur, thekson kreu i grupit parlamentar të Partisë Popullore Evropiane, Manfred Weber në letrën e tij drejtuar Presidentes së PE, Roberta Metsola.

“Duke pasur parasysh nevojën urgjente për të ndihmuar Ukrainën të plotësojë rezervat e saj të municionit, Grupi PPE dëshiron të kërkojë një procedurë urgjente sipas rregullit 163 të Rregullores së Punës të Parlamentit mbi propozimin e Komisionit për një rregullore “Akti i Mbështetjes së Prodhimit të Municioneve”, thotë Weber.

Njëkohësisht ai thekson se votimi procedural i kësaj kërkese mund të mbahet të martën më 9 maj, ndërsa votimi i propozimit mund të caktohet në seancën plenare të majit.

"Kjo do t'u japë kohë ekspertëve tanë - veçanërisht anëtarëve që aktualisht punojnë në propozimin për një nxitje industriale evropiane të mbrojtjes përmes Aktit të Prokurimit të Përbashkët - për të vlerësuar propozimin sa më shpejt që të jetë e mundur pas debatit plenar të hënën më 8 maj dhe shkëmbimit të pikëpamjeve që janë planifikuar për Konferencën e Presidentëve, e enjte 11 maj”.

Manfred Weber përfundon duke thënë se “Ukraina ka nevojë për municion sa më shpejt të jetë e mundur! Ne besojmë se me këtë qasje Parlamenti mund të veprojë shpejt, duke respektuar prerogativat tona.Do të isha mirënjohës nëse mund ta shpallnit këtë kërkesë në fillim të seancës plenare të majit."

lufta ne ukraine