Pas eliminimeve nga Izraeli: Hamasi shqyrton udhëheqjen kolektive për krahun ushtarak

Lëvizja palestineze Hamas po shqyrton krijimin e një strukture udhëheqëse kolektive për krahun e saj të armatosur, në një përpjekje për të ruajtur funksionimin e komandës pas një serie eliminimesh të drejtuesve të lartë nga Izraeli.

Sipas raportimeve nga media arabe Asharq Al-Awsat, plani parashikon një model të ngjashëm me komitetin drejtues që Hamas ka ngritur më herët në mërgim. Kjo zgjidhje shihet si emergjente dhe potencialisht e përkohshme, me synim garantimin e vazhdimësisë së komandës së Brigadave Al-Qassam.

Nevoja për një riorganizim të tillë vjen pas vrasjes, brenda pak javësh, të disa figurave kyçe të strukturës ushtarake, përfshirë komandantin kryesor Ezzedine al Haddad, pasuesin e tij Mohammed Odeh dhe zëvendësin Imad Aslim, të cilët u vranë në sulme të synuara izraelite.

Burimet theksojnë se ende nuk është e qartë nëse bëhet fjalë për një ide në diskutim apo për një vendim të marrë, por theksojnë se Hamas ka nevojë për një zinxhir komandues më fleksibël dhe të mbrojtur, për të ruajtur kontrollin në zonat që ende administron në Rripin e Gazës.

Ndërkohë, aparati i sigurisë së brendshme i organizatës ka intensifikuar përpjekjet për të identifikuar persona të dyshuar për bashkëpunim me Izraelin, të cilët mund të kenë ndihmuar në realizimin e eliminimeve të njëpasnjëshme të drejtuesve.

Situata është komplikuar më tej pas vrasjes së tre zyrtarëve përgjegjës për mbrojtjen e komandantëve të lartë, çka konsiderohet si tregues i një niveli të lartë infiltrimi në radhët e organizatës.

Pavarësisht goditjeve të vazhdueshme, Hamas vijon të mbajë kontroll në disa zona të Gazës, megjithëse me hapësira gjithnjë e më të kufizuara për shkak të presionit të ushtrisë izraelite, shërbimit të sigurisë Shin Bet dhe grupeve lokale që, sipas raportimeve, mbështeten nga Izraeli.

Në përpjekje për të rindërtuar strukturën drejtuese, disa emra janë përmendur si kandidatë të mundshëm për të marrë drejtimin e krahut ushtarak. Mes tyre është Imad Akel, një veteran i Brigadave Al-Qassam, i cili ka mbijetuar disa tentativave për eliminim nga Izraeli.

Po ashtu, përmendet edhe Muhannad Rajab, i konsideruar si strateg me përvojë, si dhe figura të tjera si Ezzedine al Beik dhe Mohammed al Bureim, të cilët aktualisht mbajnë role të rëndësishme në terren.

Megjithatë, burimet nënvizojnë se çdo emërim i mundshëm mund të mos ndodhë menjëherë, ndërsa organizata përpiqet të përshtatet me një situatë të paqëndrueshme dhe të rrezikshme.

Më herët, pas goditjeve ndaj drejtuesve të Hamasit jashtë Gazës, në qytete si Bejruti, Teherani dhe Doha, organizata kishte krijuar një këshill drejtues kolektiv duke mbajtur të fshehtë identitetin e drejtuesve. Megjithatë, kjo strategji nuk ka arritur të ndalë plotësisht sulmet e synuara nga Izraeli.

Zhvillimet e fundit tregojnë për një fazë të re sfidash për Hamasin, ndërsa përpiqet të ruajë strukturën dhe ndikimin e tij në kushtet e një presioni të vazhdueshëm ushtarak dhe inteligjent.