Panik në ajër, aeroplani g*ditet nga një fishekzjarr gjatë uljes në Çikago, piloti: Dëgjuam një shpërthim të fortë

Një aeroplan i kompanisë Delta Air Lines është goditur nga një fishekzjarr teksa po i afrohej pistës për ulje në Aeroportin Ndërkombëtar Midway në Çikago, gjatë festimeve të 4 Korrikut në Shtetet e Bashkuara.

Pavarësisht incidentit, avioni u ul në mënyrë të sigurt dhe nuk pati të lënduar.

Kompania Delta konfirmoi se fluturimi 1076, i cili kryente linjën Atlanta–Çikago, përfundoi normalisht uljen dhe nuk ishte e nevojshme një ulje emergjente. Sipas kompanisë, asnjë pasagjer dhe asnjë anëtar i ekuipazhit nuk u lëndua.

“Fluturimi 1076 i Delta nga Atlanta (ATL) drejt Çikagos (MDW) dyshohet se ka rënë në kontakt me një fishekzjarr gjatë zbritjes. Avioni u ul në mënyrë të sigurt dhe më pas u drejtua drejt portës së terminalit”, deklaroi një zëdhënës i kompanisë.

Pas mbërritjes, avioni u tërhoq përkohësisht nga programi i fluturimeve, në mënyrë që t’i nënshtrohej kontrolleve të detajuara teknike për të verifikuar nëse kishte pësuar dëmtime.

Sipas të dhënave të fluturimit, avioni u nis nga Aeroporti Ndërkombëtar Hartsfield-Jackson në Atlanta në orën 19:36 me orën lokale dhe mbërriti në Aeroportin Midway të Çikagos në orën 20:38.

Në një regjistrim të komunikimit mes pilotit dhe kullës së kontrollit ajror dëgjohet piloti duke raportuar incidentin.

“Një fishekzjarr sapo goditi avionin tonë. Dëgjuam një zhurmë shumë të fortë dhe avioni duhet të kontrollohet sapo të arrijmë në portë. Shpresojmë që të ketë qenë vetëm një fishekzjarr që shpërtheu poshtë nesh, por goditja ishte e fortë”, tha ai.