Atentat me armë në Tiranë, vritet 41 vjeçari, Devi Kasmi

Një 41-vjeçar me precedentë penalë që kishte ndryshuar emrin u vra me pesë plumba pranë godinës së SHISH në Tiranë.

Viktima është identifikuar me emrin Devi Kasmi por verifikimet e policisë zbuluan se ai më parë kishte përdorur edhe emrin Dëfrim.

Rreth orës 18.44 të së hënës, ai ka qenë duke lëvizur në një rrugicë të errët në rrugën "Kongresi i Manastirit" ku është qëlluar pesë herë me armë zjarri duke mbetur i vdekur në vend.

Policia shkoi menjëherë në vendin e ngjarjes ku mori në pyetje dëshmitarët të cilët kanë thënë se autorët kanë qenë dy person me skafandra në kokë që kanë qëlluar viktimën me armë të shkurtra dhe janë larguar me motor nga vendi i atentatit.

Gjatë hetimeve uniformat blu kanë zbardhur faktin se me identitetin e tij të mëparshëm 41-vjeçari ishte dënuar nga gjykata e Tiranës në vitin 2010 për falsifikim dokumentesh.

Sipas policisë, në vendin e ngjarjes janë gjetur armë që dyshohet se viktima i mbante me vete.

Pista kryesore e hetimit mësohet se është ajo e konflikteve për aktivitete kriminale ku dyshohet se ishte implikuar 41-vjeçari.

Hetimet në vendin e krimit janë asistuar edhe nga drejtori i policisë së Tiranës Ardi Veliu.



EMISIONET