Pistoleta “TT” që vrau Nikulajn, është hedhur në lumë. RENEA zhytet për armën. Në Shkodër, kërkime për bazën e dytë të Haxhisë

Vrasja e biznesmenit Ardjan Nikulaj, tashmë ka 6 persona të identifikuar dhe shpallur në kërkim, por asnjë prej tyre deri në këtë kohë nuk është arrestuar.

Policia kriminale e Lezhës dhe prokuroria e qytetit, kanë zhvilluar një punë kërkimore që ka shërbyer në zbardhjen e ngjarjes, duke siguruar prova të forta që faktojnë implikimin direkt të hasmit Edmond Haxhia, katër shtetasve Britanikë, Harry Simson, Thomas Mithan, Steven Hunt, Harriet Bridgeman dhe një portugezi Ruben Saraiva.

Ditën e djeshme policia arriti të gjejë në lumin Drin dhe motorin “Yamaha X Max”, i cili ishte blerë në 28 Mars në Tiranë kundrejt shumës financiare prej 1800 euro.

Motori, ishte fundosur në lumë jo më larg se 100 metra larg banesës së Edmond Haxhia, në fshatin Kakarriq të Lezhës.

Ndërkohë një burim pranë policisë së Lezhës, tha për “Ora Neës” se dhe arma e krimit tip “TT” e përdorur në vrasjen e Nikulajt, është hedhur në lumin Drin.

Kërkimet për gjetjen e armës, janë kryer nga zhytësit e RENEA-s, por pa rezultat. Kërkimet do vazhdojnë dhe ditën e sotme me shpresën e gjetjes së armës së zjarrit.

Kërkimet janë vështirësuar edhe për shkak të rritjes së nivelit të ujit në lumin Drin, për shkak të shirave të ditëve të fundit. Veç rritjes së nivelit të ujit, lumi ka pasur turbullirë dhe balta mund të ketë mbuluar armën, duke sjellë vështirësi në gjetjen e saj.

Sipas policisë fshati Kakarriq, ka qënë një ndër bazat kryesore, ku kanë qëndruar Edmond Haxhia dhe portugezi Ruben Saraiva.

Ndërsa një bazë e dytë, që është përdorur si vend strehim i tyre është në Shkodër. Prej 5 ditësh policia e Lezhës dhe ajo e Shkodrës, janë duke kryer kontrolle në një banesë në qytetin e Shkodrës, ku kanë qëndruar dy personat.

Zbulimi i bazës së dytë dhe gjetja e armës, tashmë është kthyer në nje mision parësor i policisë.

Banesa është marë me qëra nga Edmond Haxhia. Në këtë shtëpi kanë hyrë vetëm shtetasi Portugez dhe Haxhia. Por për këtë bazë të dytë në Shkodër, nuk ka informacion dhe e fejuara e Haxhisë, e cila ka treguar në polici çfarë dinte mbi lëvizjet e dy personave.

“Ora News” mëson se për prezencën e banesën në Shkodër, policia është vënë në dijeni gjatë kontrollit të një automjeti tip “Golf4”, që ka përdorur Edmond Haxhia, gjatë kohës së qëndrimit në Shqipëri.

Në bagazhin e këtij mjeti, policia ka gjetur disa kupona tatimorë të një supermarketi “S…r” që ushtron aktivitet tregtar në Shkodër.

Policia ka shkuar pranë ambjenteve të supermarketit, duke verifikuar kamerat pikërisht në datat dhe orën kur ishin printuar kuponat tatimorë.

Në pamjet filmike shfaqet Edmond Haxhia dhe portugezi Ruben Saraiva, të cilët shfaqen së bashku duke blerë produkte ushqimore dhe më pas largohen në këmbë në drejtim të një rrugice lagjeje.

Për shkak të mungesës së kamerave të mëtejshme,në rrugët e lagjes në Shkodër, policia prej 5 ditësh e ka pasur të pamundur gjetjen e shtëpisë. Deri në këtë fazë është punuar me mbledhjen e informacioneve operative, por deri në këtë fazë pa rezultat.

Rasti i vrasjes së Ardian Nikulajt duke përdorur vrasës të huaj, është rasti i dytë që shënohet në Shqipëri, pas precedentit ku një grup kriminal kontraktoi efektivin e forcave speciale Greke, Eftimiu Eftimiun, për vrasjen e Devis Kasmit në Tiranë.

ardian nikulaj nikulaj elton qyno shkodër pistoleta