Pastrim parash me flori/ Arrestohet administratori, dy të tjerë në kërkim, shmangën tatimet

Prokuroria e Tiranës ka ngritur akuzë ndaj katër personave, dy shqiptarë dhe dy italianë për pastrim parash përmes tregtisë fiktive të floririt. Skema realizohej me anë të faturave që plotësoheshin nga kompania e Kreshnik Kurtit, motrës së tij dhe dy shtetasve italianë për të justifikuar transferimin e shumave të mëdha monetare nga Italia në Tiranë, ku më pas tërhiqeshin dhe zhdukeshin.

Dy shtetas shqiptarë dhe dy italianë akuzohen nga Prokuroria e Tiranës se kanë kryer pastrim parash përmes një kompanie të dyshuar fiktive që merrej me tregtinë e floririt.

Subjekti i krijuar në vitin 2016 kishte si administrator të 50 përqind të pronësisë, shtetasin Kreshnik Kurti që është mes të arrestuarve.

Në këtë skemë është përfshirë dhe motra e tij, Kejda Kurti, e shpallur në kërkim bashkë me shtetasin italian Pietro Savino Cosentiono, si dhe zviceranen Nicoletta Isabella Jolandade Petris Borroni Trebbi, banuese në Itali.

Këta të fundit zotëronin 50 përqind e aksioneve të tjera të kompanisë dhe akuzohen për “Fshehje të ardhurash” dhe “Pastrimi i produkteve të veprës penale ose të veprimtarisë kriminale”.

Hetimi ka nisur në vitin 2020 në lidhje me subjektin TIRANA-BULLION Sh.p.k.

Gjatë hetimeve, Prokuroria tha se ka zbuluar një skemë e mirëfilltë e transferimit të shumave monetare me prejardhje të dyshuar kriminale nëpërmjet sistemit bankar nga Italia me destinacion Shqipërinë.

Në njoftim, thuhet se nëpërmjet shoqërisë fiktive TIRANA-BULLION Sh.p.k bëheshin blerje fiktive të floririt dhe më pas shitje fiktive me fatura tatimore, ku qëllimi i vetëm ishte që nëpërmjet këtyre faturave të justifikoheshin transfertat e vlerave të larta monetare me origjinë të dyshuar kriminale dhe që kapin shifrën e miliona eurove nga bankat italiane në ato shqiptare. 

Transferta në dukje të justifikuara me anë të një faturimi të rregullt, duke i paraqitur si pagesa të blerjeve të floririt të përdorur, sipas Prokurorisë arrinin t’i shpëtonin kontrollit të agjencive mbikqyrëse në fushën e pastrimit të parave dhe sapo këto shuma mbërrinin në Shqipëri tërhiqeshin cash dhe zhdukeshin.

Hetuesit bënë të ditur se duke pasur parasysh vlerën e detyrimit tatimor të shmangur dhe vijimësinë e veprimtarisë së kundërligjshme, është kërkuar masa arrest me burg për katër persona, dy nga të cilët janë arrestuar dhe dy të tjerë janë në kërkim.

prokuroria pastrim parash kreshnik kurti flori