Elbasani gati për ditën e verës, nisin përgatitjet në të gjithë qytetin. Kryebashkiaku Llatja: Ruajmë traditën!

Ditën e mërkurë me 14 mars në vendin tonë shënohet Dita e Verës, një festë e cila simbolizon ardhjen e stinës së verës. Kryeqendra e festimeve është Elbasani, ndërsa atje kanë nisur përgatitjet për të mirëpritur këtë ditë.

Elbasani është gati për të pritur 14 marsin, ditën e Verës!

Qindra qytetarë pritet t’i drejtohen të martën kryeqendrës së festimeve të festës që simbolizon ardhjen e verës.

Gjithçka duket gati në qytet.

Zbukurimet kanë mbuluar sheshet kryesore të qytetit.

Edhe ballokumeja, ëmbëlsira tradicionale e ditës së verës, është gati.

Kreu i Bashkisë Gledian Llatja tha se qyteti do të mirëpresë dhjetëra aktivitete.

Kryetari i bashkisë së Elbasanit, Gledian Llatja në një lidhje me skype për “Ora News” rrëfeu disa prej aktiviteteve që do të organizohen në festimet e Ditës së Verës, që pritet të kulmojnë nesër në 14 mars.

“Nesër në Elbasan lëvizja do të jetë pa makina. Kush vjen nga rrethet, do të parkojë në periferi.

Të gjithë janë të mirëpritur në Ditën e Verës në Elbasan.

Aktivitetet nisin nga sot dhe do të zgjasin deri nesër në darkë. Do ketë të ftuar këngëtarë. Po ashtu, do ketë dhe kampionate dhe aktivitete të shumta ku do të ketë dhe çmime për fituesit

Ballakumja e prodhuar në shtëpi, por dhe në punishte të vogla janë tregues se tradita po ruhet.

Dhe ka kërkesa të shtuar në të gjithë vendin për hoteleri. Kjo pasi  në strukturat akomoduese kanë pasur gjatë këtyre ditëve shumë kërkesa për rezervime.

Të gjithëve do t’u jepet shërbimi në maksimum. Po ashtu janë marrë masat për të garantuar sigurinë publike”, u shpreh kryebashkiaku i Elbasanit Gledian Llatja.

Për të shijuar këto larmi aktivitetesh me rastin e festës pagane të “Ditës së Verës” kryebashkiaku Llatja fton të gjithë shqiptarët kudo ku ndodhen brenda dhe jashtë vendit që të bashkohen dhe të shijojnë kënaqësinë e stinës së pranverës në Elbasanin e luleve dhe traditës.

Dita e verës simbolizon ndërrimin e stinës, ndërsa qindra mijëra qytetarë pritet ti drejtohen elbasanit të mërkurën për  të festuar.