Simone Inzaghi, arkitekti i suksesit zikaltër: trofe, rekorde dhe arkë e mbushur plot

“Atje ku stërvis unë, rriten të ardhurat, përgjysmohet humbja dhe fitohen trofetë” – kështu deklaronte Simone Inzaghi me plot vetëbesim, në një kohë kur ende nuk ishte shndërruar në një pikë referimi për botën zikaltër dhe shumëkush e shihte me dyshim në stolin e një klubi me pritshmëri të mëdha si Interi.

Sot, gati dy vjet e gjysmë pas asaj fraze të famshme, askush nuk mund t’i mohojë Simone Inzaghit meritat që i takojnë.

Pa shpenzime të mëdha dhe pa emra të bujshëm në merkato, “Demoni” nga Piacenza ka sjellë në Appiano Gentile plot 6 trofe: një Scudetto, dy Kupa të Italisë dhe tri Superkupa.

Por mbi të gjitha, ai ka rikthyer Interin në majat e Europës, duke e çuar në një finale dhe një gjysmëfinale të Champions League në harkun e vetëm tri sezoneve.

Me këtë arritje të fundit, Inzaghi hyn përfundimisht në historinë e Interit: vetëm Helenio Herrera para tij kishte arritur të çonte zikaltrit dy herë në gjysmëfinalet e kompeticionit më të rëndësishëm europian për klube.

Të ardhura rekord për klubin

Jo vetëm suksese sportive, por edhe përfitime të mëdha ekonomike.

Ashtu siç pati paralajmëruar vetë Inzaghi, të ardhurat janë rritur ndjeshëm falë performancës së shkëlqyer të skuadrës në Europë.

Këtë sezon, pas kualifikimit ndaj Bayern Munich dhe hyrjes në katërshen më të mirë të Champions League, Interi do të arkëtojë një shumë rekord prej 113 milionë eurosh nga UEFA – shumë më tepër se sa përfitoi edhe në sezonin e finales së humbur në Stamboll kundër Manchester City-t.

Sipas Calcio e Finanza, përfitimet financiare janë:

Bonus për pjesëmarrje: 18.62 milionë euro
Pozicioni në renditje historike: 9.7 milionë euro
Kuota e të drejtave televizive në Europë: 24.02 milionë euro
Kuota joeuropiane: 7.36 milionë euro
Bonus për rezultate: 13.3 milionë euro
Bonus për arritjen në top 8: 2 milionë euro
Bonus për kualifikim në 1/8 e finales: 11 milionë euro
Bonus për kualifikim në çerekfinale: 12.5 milionë euro
Bonus për kualifikim në gjysmëfinale: 15 milionë euro
Simone Inzaghi nuk është më vetëm një trajner i suksesshëm – ai është kthyer në simbolin e rilindjes së Interit, brenda dhe jashtë fushës. E ardhmja duket edhe më premtuese.