Finalja e madhe në New Jersey/ Messi kërkon një tjetër mrekulli, Spanja sfidon kampionët

Pas më shumë se një muaji emocione, rekorde dhe sfida mes kombëtareve më të mira të botës, gjithçka zbret në një ndeshje të vetme. Spanja dhe Argjentina përballen sonte në New Jersey për finalen e madhe të Kupës së Botës 2026, në një duel që për herë të parë në histori i vendos këto dy ekipe përballë njëra-tjetrës në këtë fazë të turneut.

Finalja nis në orën 21:00 dhe përballë do të jenë dy kampionë të kontinenteve. Spanja, fituese e Europës, kërkon trofeun e dytë botëror pas triumfit të vitit 2010, ndërsa Argjentina, kampionia në fuqi, synon të përsërisë suksesin dhe të bëhet vetëm skuadra e dytë pas Brazilit që fiton dy Botërorë radhazi.

Messi kërkon fundin perfekt
Në prag të finales, Lionel Messi iu drejtua tifozëve argjentinas me një mesazh ku kujtoi rrugëtimin e gjatë të kësaj skuadre.

Kapiteni i Argjentinës, tetë herë fitues i “Topit të Artë”, mund të shkruajë një tjetër kapitull historik në karrierën e tij. Me paraqitjen në këtë finale, Messi do të bëhet futbollisti i dytë në histori pas brazilianit Cafu që merr pjesë në tri finale të Kupës së Botës. Ai është gjithashtu i pari që i luan të trija si titullar.

Spanja kërkon kurorën, Argjentina mbron titullin
“La Roja” vjen në finale pas një Botërori ku ka treguar forcë në lojë dhe kontroll të lartë teknik. Skuadra e Luis de la Fuente synon të rikthehet në majën e futbollit botëror pas 16 vitesh.

Nga ana tjetër, Argjentina ka kaluar një rrugëtim më të vështirë, por me një lider si Messi dhe një grup lojtarësh që kanë treguar karakter në momentet vendimtare.

Në stërvitjen e fundit para finales, atmosfera te kampionët në fuqi ishte pozitive, me lojtarët që u shfaqën të qetë dhe të përqendruar. Ndërkohë, Spanja nuk arriti të zhvillojë përgatitjen në fushë për shkak të motit të keq në New Jersey, me shi dhe rrufe, duke u zhvendosur në palestër.

Trajneri spanjoll Luis de la Fuente kërkoi respekt për kundërshtarin, ndërsa përballja mes dy stileve të ndryshme pritet të jetë një nga momentet më të mëdha të këtij Botërori.

Trofeu, miliona dhe një ceremoni ndryshe
Përveç titullit kampion bote, fituesi i finales do të shpërblehet me 50 milionë dollarë, ndërsa skuadra humbëse do të marrë 33 milionë.

FIFA do të shpërndajë gjithashtu 30 unaza për kampionët, me vlerë rreth 130 mijë dollarë secila.

Ceremonia e dorëzimit të trofeut do të ketë edhe një ndryshim këtë vit, pasi përkrah presidentit të FIFA-s Gianni Infantino pritet të jetë edhe Donald Trump, duke ndryshuar traditën e viteve të mëparshme.

Sonte në New Jersey nuk luhet vetëm një finale. Spanja dhe Argjentina kërkojnë një vend në historinë e futbollit botëror.