Ankthi mund të jetë në gjenet tuaja? Shkencëtarët zbulojnë 74 variante gjenetike të lidhura me ankthin

Janë identifikuar 74 variante gjenetike të lidhura me çrregullimet e ankthit, shumë të përhapura dhe në rritje, veçanërisht te të rinjtë.

Nga këto variante gjenetike, më shumë se gjysma (39) nuk ishin lidhur kurrë më parë me çrregullimet e ankthit.

Ato u zbuluan falë studimit më të madh të kryer deri më sot në këtë fushë, i cili përfshiu pothuajse 700 mijë persona me origjinë evropiane.

Studimi është publikuar në revistën shkencore Nature Human Behaviour.

Analiza, e udhëhequr nga King’s College London dhe QIMR Berghofer Medical Research Institute në Brisbane të Australisë, mundëson një kuptim më të mirë të bazave gjenetike të këtyre çrregullimeve dhe të mënyrës se si ato ndërveprojnë me faktorë të tjerë kyç, si përvojat e jetës dhe konteksti social.

Shumë nga gjenet e identifikuara nga studiuesit, të koordinuar nga Thalia Eley e King’s College, janë veçanërisht aktive në tru dhe përfshihen në mënyrën se si qelizat nervore komunikojnë me njëra-tjetrën.

Studimi zbuloi gjithashtu shumë lidhje gjenetike midis ankthit dhe sëmundjeve të tjera, si mendore ashtu edhe fizike, përfshirë depresionin, sindromën e zorrës së irrituar, dhimbjen kronike, sëmundjen koronare të zemrës, endometriozën dhe migrenën.

Këto lidhje tregojnë ndërlidhjen e ngushtë midis shëndetit mendor dhe atij fizik. Rezultatet tona nuk tregojnë një marrëdhënie shkak-pasojë, por ngrenë pyetje të rëndësishme për kërkimet e ardhshme”, tha Brittany Mitchell nga instituti australian, autore e parë e studimit së bashku me Megan Skelton të King’s College.

Është e rëndësishme të theksohet se një person me rrezik të lartë gjenetik mund të mos zhvillojë kurrë ankth, ndërsa një person me rrezik të ulët gjenetik mund ta zhvillojë atë. Megjithatë, kuptimi i këtij rreziku mund të na ndihmojë të identifikojmë njerëzit më të ndjeshëm ndaj ndikimeve mjedisore, shton Skelton.

Kjo mund të kontribuojë përfundimisht në strategji më efektive për parandalimin dhe trajtimin e çrregullimeve të ankthit.