Haxhiu për lirimin e Radoiçiçit: Serbia, strehë e kriminelëve të luftës dhe terroristëve

Haxhiu për lirimin e Radoiçiçit: Serbia, strehë e

Ministrja e Drejtësisë në Kosovë, Albulena Haxhiu, duke komentuar lirimin e Milan Radoiçiçit, ka thënë se asnjë veprim i Serbisë nuk i befason, pasi sipas saj, shteti serb është strehë për kriminelët e luftës dhe terroristët.

Haxhiu tha se Serbia nuk i ka dorëzuar asnjëherë kriminelët e luftës e nuk do t’i dorëzojë as terroristët.

“Sulmi terrorist në Kosovë është dirigjuar, siç është dëshmuar, nga Serbia dhe në këtë drejtim, çfarëdo veprimi në raport me këtë çështje, me grupin e armatosur, që e bën Serbia nuk na befason aspak. Serbia nuk i ka dorëzuar asnjëherë kriminelët dhe nuk do t’i dorëzojë as terroristët. Thënë qartë, Serbia është strehë e kriminelëve të luftës dhe terroristëve që para 10 dite bën sulm terrorist në territorin e Kosovës”, tha Haxhiu të mërkurën.

Ministrja Haxhiu ka siguruar qytetarët që institucionet e drejtësisë janë duke bërë punë të mirë për ta hetuar sulmin e armatosur më 24 shtator në Banjskë të Zveçanit, ku vdiq rreshteri Afrim Bunjaku. Por për shkaqe hetimore, ajo ka thënë se s’mund të jep më shumë detaje.

“Përballë një Serbie që nuk distancohet nga e kaluara, dirigjon sulme të armatosura në Kosovë dhe nuk i dorëzon kriminelët dhe terroristët, është vigjilenca, puna e madhe e institucioneve të Kosovës, veçanërisht Policia e Kosovës, njësiteve të hetimeve, njësiteve speciale, Prokurorisë dhe Gjykatës. Institucionet e drejtësisë po e bëjnë punën e tyre. Për shkak të hetimeve, nuk mund të jap detaje çfarë po ndodh. Vetëm desha t’iu siguroj që institucionet po bëjnë punën e tyre”, ka thënë ajo.

Haxhiu ka përsëritur edhe një herë që Kosova do të kërkojë dorëzimin e Radoiçiçit.

"Mund të vonojë në kohë, për shkak të mungesës së bashkëpunimit të Serbisë, por nuk mund t'i ikë drejtësisë terroristi Radoiçiç", ka thënë ministrja Haxhiu, duke shtuar se e kanë detyrim të shpallin një fletë-arrest ndërkombëtar për ish-nënkryetarin e Listës Serbe. 

EMISIONET