PLAS DEBATI NË KOMISIONIN E JASHTËM/ Opozita kërkon shpalljen “non grata” të Paunoviç, Hasani: Qelbësirë, e çmendur!

Debatet për deklaratat e ministres serbe të Administratës dhe Pushtetit Lokal, Snezhana Paunoviç, kanë sjellë përplasje mes opozitës dhe mazhorancës në Komisionin për Europën dhe Punët e Jashtme.

Deputetët e PD-së kërkuan një qëndrim të përbashkët të komisionit dhe masa diplomatike ndaj ministres serbe, ndërsa mazhoranca u përball me kritika për mënyrën e reagimit ndaj çështjes.

Deputetja e PD-së, Albana Vokshi, kërkoi që Paunoviç të shpallet person i padëshiruar në Shqipëri dhe që Komisioni të miratojë një deklaratë dënuese për deklaratat e saj lidhur me spastrimin etnik në Kosovë.

Sipas Vokshit, deklaratat e ministres serbe nuk mund të trajtohen si një qëndrim personal, pasi ajo mban një post zyrtar në qeverinë e Serbisë.

Ajo kërkoi gjithashtu që qeveria shqiptare të ndërmarrë hapa diplomatikë dhe të thërrasë ambasadorin serb për të paraqitur një notë proteste.

“Nuk bëhet fjalë për një gafë politike, por për një deklaratë që legjitimon spastrimin etnik. Shqipëria nuk mund të heshtë përballë relativizimit të krimeve të regjimit të Millosheviçit”, u shpreh Vokshi gjatë mbledhjes.

Kryetari i Komisionit, Igli Hasani, kundërshtoi akuzat e opozitës, duke kujtuar se qeveria shqiptare dhe përfaqësues të mazhorancës kanë reaguar ndaj deklaratave të ministres serbe.

“Qëndrimi ynë ka qenë i qartë për të dënuar një deklaratë të papranueshme dhe një person që përfaqëson të shkuarën e Millosheviçit”, u shpreh Hasani.

Debati u përshkallëzua mes palëve, me akuza të ndërsjella për mënyrën e trajtimit të çështjes. Tritan Shehu kërkoi që komisioni të mbajë një qëndrim zyrtar, duke e cilësuar deklaratën e ministres serbe si të rrezikshme dhe pjesë të një qasjeje armiqësore ndaj Kosovës.

Përplasjet mes deputetëve bënë që mbledhja të ndërpritej për disa minuta. Pavarësisht kërkesës së opozitës për një deklaratë të përbashkët, propozimi nuk u hodh në votim.

Ndërkohë, deputeti i mazhorancës, Toni Gogu, u shpreh se çështja nuk duhet të përdoret për përplasje politike dhe se reagimet e institucioneve shqiptare kanë qenë të qarta.

Albana Vokshi: Para disa ditësh, ministrja serbe ka deklaruar në një intervistë se po të ishte në vend të Millosheviçit në 1998 ajo do ta kishte spastruar etnikisht Kosovën. Kjo nuk është gafë politike, as deklaratë e nxituar, por është legjitimim i hapur i spastrimit etnik. Është deklaratë skandaloze, e dënueshme dhe që ka ngjallur reagim kombëtar dhe ndërkombëtar. Me njëherë pas kësaj deklarate reagoi BE, komisionerja për zgjerimin, qeveria gjermane, Mbretëria e Bashkuar, eurodeputetë. Ndërkohë që kryeministri zgjodhi të heshtë. Ende sot që flasim, kryeministri që flet për çdo gjë, vetëm për këtë deklaratë skandaloze të qeverisë serbe hesht. Ndërkohë ministria e jashtme ka bërë një reagim të thatë dhe nuk ka ndërmarrë asnjë iniciativë tjetër. PD ka kërkuar shpalljen non grata, ku është kryeministri? Pse nuk shpallet non grata, pse nuk thirret me urgjencë ambasadori serb dhe t’i paraqitet një notë proteste. Kur relativizohen krimet e Millosheviç, Shqipëria nuk mund të heshtë. Në kërkojmë shpalljen e saj non grata dhe inicim e një padie për nxitje të spastrimit etnik dhe të thërritet ambasadori serb për t’i paraqitur notë zyrtare. Ne si komision të dalim m enjë deklaratë të përbashkët, se çështja nuk ka kah politik, të dënojmë deklarata, ti kërkojmë qeverisë shqiptare të marrë hapat diplomatike të nevojshëm. Unë kam sjellë një draft-deklaratë.

Hasani: Qeveria shqiptare ka mbajtur një qëndrim për atë frazë të tmerrshme e të papranueshme, të thënë nga një qelbësirë që përpiqet t’i nxjerrë të gjitha komplekset e rinisë së saj nëpërmjet asaj deklarate. Ministri i Jashtëm ka mbajtur qëndrim, kreu i grupit në seancën e kaluar ka mbajtur qëndrim. Kjo mazhorancë ka qenë e qartë në dënimin e një individi që përfaqëson të shkuarën e Millosheviçit. Spastrimin etnik e kanë pasur dëshirë dhe, në momente të caktuara, janë përpjekur ta shndërrojnë në realitet, por shqiptarët nuk mund t’i spastrojnë etnikisht aq lehtë. Këto personazhe qesharake nuk mund ta qesharakëzojnë punën e shqiptarëve, kudo që janë. Ne kemi qenë të qartë, konsekuentë dhe shumë të hapur për të kuptuar realitetin në të cilin ndodhemi. Nuk ka asnjë dilemë për qëndrimet tona. Askush nuk ka shans t’i vërë në diskutim shqiptarët, Kosovën dhe realitetin ku jetojnë shqiptarët, qoftë edhe për konsum të brendshëm elektoral. Mos u merrni me injorantë dhe delirantë.

Vokshi e Shehu:E minimizove.

Hasani:Mos me thuaj e minimozve.
......

Shehu: Ne jemi komisioni i jashtëm, nuk mund t’i anashkalojmë këto veprime, ne bëjmë analizën e veprimit të politikave të jashtme. Ne duhet të shprehemi dhe i rekomandojmë qeverisë se çfarë duhet të shprehet. Këtu kemi të bëjmë me një deklaratë tejet të rrezikshme, me një qëndrim që kërkon të nxisë diçka dhe që është në vazhdën e qëndrimeve armiqësore ndaj Kosovës dhe që lidhet me atë që kërkon të mbulohet gjenocidi serb në Kosovë. Qeveria shqiptare duhet të marrë masa, deklaratat nuk janë dokumente formale. Nuk mund ta trajtojmë sikur është një qytetare e thjeshtë, është një anëtare e qeverisë.

Vokshi: Ruani etikën, mos e ngrini zërin se fyerja e kolegevë të opozitës nuk ju jep të drejtë në atë që thoni.

Hasani: Kur më jep ti leksione për ruajtjen e durimit, është fundi i botës, të nis javën me leksione nga ti për ruajtje durimi dhe gjuhë të mirë.

Vokshi: A mund të qetësoheni? Shoh që qenkeni në siklet.

Hasani: Jam aq i qetë, o zonja Vokshi.

Vokshi: E kuptoj që kjo gjuhë ju prek. E kuptoj që, duke ngritur zërin, ju mundiheni të fshihni heshtjen e dënueshme të kryeministrit.

Hasani: Nuk fsheh heshtjen e askujt. E kuptoj dëshirën për të përdorur deklaratën budallaqe të një të çmendure.

Vokshi: Ajo është ministre, s’mund të trajtohet si individ i çmendur.

Hasani: E çmendur, një qelbësirë e çmendur që ia ka arrit qëllimit të vërë këtë komision të flasë budallëqe.

Vokshi: Ju duhet të reagoni. Ky komision duhet të reagojë.

Hasani: Fol, por mos u merr me mua.

Vokshi: Drejtohuni siç duhet, ruani etikën dhe qetësinë. Ju më fyeni, por unë nuk i përgjigjem fyerjes suaj.

Hasani: Mos u merr me mua.

Vokshi: Opozita nuk do ta mbyllë gojën. Kërkojmë të dalim me një deklaratë të përbashkët që të dënojmë deklaratat e ministres serbe.
Ndërkohë, kërkesa e PD për të miratuar deklaratën nuk u hodh fare në votim.

Spahiu: Ky komision ka ditur të bëjë rezoluta të përbashkëta. Opinioni publik ka nevojë për koherencë. Në 7 ditë ka patur deklarata të ministrit të jashtëm ,tët gjithë grupit të PS. Kanë kaluar 7 ditë, por të gjesh një kauzë për të ardhur në komision dhe të rrish një orë dhe pastaj të ikësh në 11 pa 5 pa i kushtuar asgjë rendit të ditës që kanë të bëjnë me integrimin kjo s’më duket e drejtë.