Ngjarja e rëndë tek gjykata e Apelit/ Reagon ministrja e Brendshme, Koçiu: Dënoj me forcë aktin

Ministrja e Brendshme, Albana Koçiu, u shpreh thellësisht e tronditur nga vrasja e gjyqtarit të Apelit, Astrit Kalaja, dhe plagosja e dy personave brenda sallës së gjykatës.

Ajo theksoi se Policia e Shtetit ka ndërhyrë menjëherë në vendngjarje dhe autorët janë ndaluar.

Sipas saj, policia nuk ka përgjegjësi ligjore për kontrollin e hyrje-daljeve dhe sigurinë brenda godinave të gjykatave, por ekspertët dhe prokurorët po hetojnë me rigorozitet rrethanat dhe detyrimet e punonjësve të sigurisë në gjykatë.

Reagimi i Ministres së Brendshme, Albana Koçiu:

Thellësisht e tronditur nga lajmi i rëndë i vrasjes së gjyqtarit të Gjykatës së Apelit në Tiranë, Astrit Kalaja, dhe plagosja e dy qytetarëve, brenda sallës së gjykatës.

Dënoj me forcë këtë akt barbar dhune dhe shpreh ngushëllimet më të sinqerta për familjen e viktimës, kolegët e tij, duke u uruar shërim të shpejtë të lënduarve.

Forcat e Policisë së Shtetit – të cilat duhet sqaruar për opinionin publik se në bazë të ligjit nuk kanë asnjë përgjegjësi për kontrollin e hyrje-daljeve dhe sigurinë brenda godinave të gjykatave – kanë ndërhyrë menjëherë në vendngjarje.

Autori është ndaluar menjëherë dhe kemi angazhuar ekspertët më të mirë për të kqyrur në bashkëpunim me prokurorët, përmbushjen e detyrave të ligjit nga ana e punonjësve të sigurisë të gjykatës.