Kryebashkiaku në gjyq/ Lefter Alla kërkon gjykim të shkurtuar për tenderin 3 milionë eurosh në Bulqizë

Ish-kryebashkiaku i Bulqizës, Lefter Alla ka kërkuar gjykim të shkurtuar për akuzën mbi tenderin e ujësjellësit. SPAK e akuzon për shpërdorim detyre dhe favorizim të kompanive për ndërtimin e ujësjellësit

Gjykata e Posaçme ka pranuar kërkesën e SPAK-ut për kalimin në gjykim të dosjes së ish-kryebashkiakut të Bulqizës Lefter Alla dhe 12 të akuzuarve të tjerë, për tenderin prej rreth 3 milion eurosh të një ujësjellësi në qytet.

Ish-Kryebashkiaku i Bulqizës kishte kërkuar pushim të çështjes gjë e cila u rrëzua nga togat e zeza.

Bashkë me 10 nga të akuzuarit ai ka kërkuar gjykim të shkurtuar, ndërsa vetëm dy nga të akuzuarit kërkuan gjykim të zakonshëm, kërkesa të cilat do të shqyrtohen me zgjedhjen e trupës gjyqësore.

SPAK thotë thotë se 7 zyrtarët akuzohen për shkelje të barazisë në tendera dhe shpërdorim detyre, ndërsa biznesmeni Aqif Konesha, mik i Allës që fitoi tenderin dhe personat e tjerë akuzohen për falsifikim të dokumentave, vulave dhe stampave.

Ish-kryebashkiaku socialist Lefter Alla dyshohet në bashkëpunim me ish-zyrtarët e tjerë favorizoi dy kompani gjatë procedurës së prokurimit publik me qëllim që më pas punimet për ujësjellësin t’i kryejë kompania ‘OE 2AF Albania shpk’, e cila është në administrimin e të afërmit të Allës, Aqif Konesha.

Kompanitë që dolën fituese të tenderit kishin ‘BOE Egland shpk’ dhe ‘BE-IS shpk’.

Në këtë tender bëhej fjalë për “Ndërtim i rrjetit furnizimit dhe rrjetit shpërndarës Ujësjellësi dhe ndërtimi i rrjetit të KUZ , Lagja e vjetër, qyteti Bulqizë, Bashkia Bulqizë”, me vlerë rreth 3 mln euro, me afat kohor 10 mujor. Kompanitë që dolën fituese të tenderit kanë si administrator Rasim Dacin, për ‘BOE Egland shpk’, ndërsa administratori i 'BE-IS shpk’, është Kastriot Ibrahimaj.

Gjatë seancave në GJKKO vetë Alla është shprehur se janë akuza politike dhe se është më mirë që ti thonin të hapte krahun.

bashkia bulqizë bulqizë lefter alla