Hoxha: Rasti McGonigal lidhet me goditjet ndaj opozitës në Shqipëri

Gazetari Artan Hoxha, i ftuar në emisionin “Çim Peka LIVE” në Syri TV, ka komentuar vendimin e Departamentit të Shtetit për sanksionet ndaj ish-kryeministrit Sali Berisha, duke e analizuar në një kontekst më të gjerë politik dhe institucional.

Hoxha tha se shpalljet “të papërshtatshëm për të hyrë në SHBA” nënkuptojnë në praktikë kufizim të vizave dhe aksesit në Shtetet e Bashkuara, ndërsa bëri një historik të rasteve të ngjashme ndaj disa figurave politike shqiptare ndër vite.

Ai ngriti pikëpyetje mbi lidhjet e këtyre zhvillimeve me aktivitetin e ish-zyrtarit të FBI-së, Charles McGonigal, duke pretenduar se ai ka luajtur rol kyç në një sërë ngjarjesh politike në Shqipëri gjatë viteve 2017–2018.

Sipas Hoxhës, pas këtyre zhvillimeve janë marrë vendime që kanë prekur disa figura publike dhe institucionale në vend, duke ndikuar edhe në rikonfigurimin e opozitës dhe rezultatin e zgjedhjeve të vitit 2021.

Ai pretendoi gjithashtu se shpallja “non grata” ndaj Berishës kontribuoi në përçarjen e opozitës dhe, sipas tij, në fitimin e mandatit të tretë nga mazhoranca.

‘Pra, përcaktimi ‘janë të papërshtatshëm’ do të thotë se, nëse ke vizë, ajo të bllokohet. Dhe nëse nuk ke aplikuar, Berisha, me sa di unë, nuk kishte aplikuar asnjëherë për vizë, dhe pra atij iu mohua mundësia për të aplikuar për vizë.

Tani do të bëj një historik, prandaj e nisa nga kjo datë. Po të shikosh, Shtetet e Bashkuara filluan me deklarime publike; ata kishin ndaluar edhe më përpara viza udhëtimi për politikanë në SHBA, por nuk i kishin bërë publike siç e bënë në rastin konkret, kur doli Sekretari i Shtetit.

Në shkurt të vitit 2018, i pari ishte ish-Prokurori i Përgjithshëm Adriatik Llalla, të cilit iu mohua viza për të hyrë në Shtetet e Bashkuara. Vetëm dy muaj më vonë, më 17 prill 2018, u shpall i padëshirueshëm në Shtetet e Bashkuara ish-deputeti socialist Tom Doshi dhe familja e tij.

Në korrik të vitit 2019 u shpall non grata Vangjush Dako dhe familja e tij. Dhe të fundit në këtë listë publikimesh ka qenë, me sa mbaj mend, ish-deputeti Aqif Rakipi dhe botuesi i mediave Ylli Ndroqi.

Tani çfarë i lidh këta njerëz, sepse kanë një hierarki? Aktiviteti i McGonigal, si shef i zyrës së kundërzbulimit në Nju Jork për FBI-në, është kryesisht në vitet 2017–2018.

Vizitat e McGonigal dhe aktiviteti i tij i dukshëm në Shqipëri fillojnë me vizitën e parë, kur është takuar dhe ka dalë edhe në foto me kryeministrin Edi Rama, ku janë shpërndarë edhe kapele. Një nga ato kapele kam pasur edhe unë mundësinë ta kem në atë kohë.

Në shtator të vitit 2017 ai është pritur nga kryeministri Rama dhe ka marrë materiale nga Tirana për çështje që u hapën në FBI. Është rikthyer në Shqipëri në nëntor të 2017-ës. Madje në nëntor të 2017-ës, një deputet, aleat i afërt i kryeministrit Rama, ka dhënë deklarime në prani të McGonigal dhe të një prokurori federal në Vjenë.

Në shkurt ai është rikthyer përsëri, në prill më pas ka takuar edhe Ramën në Shtetet e Bashkuara të Amerikës. Dhe çuditërisht, menjëherë pas këtyre vizitave filluan non-gratat në Shqipëri.

U godit Prokurori i Përgjithshëm dhe më pas të tjerë me radhë. Një nga dosjet që u hap në atë kohë në Shtetet e Bashkuara lidhej edhe me zgjedhjet.

Kjo non grata e Berishës, sipas kësaj analize, i dha mandatin e tretë Ramës, sepse shpartalloi opozitën. Non grata u deklarua pas zgjedhjeve të vitit 2021, por opozita u përça për katër vite, me konflikte për vulën dhe me probleme të brendshme, dhe kjo çoi në mandatin e tretë.

Tani, pse McGonigal u kthye një njeri kaq i rëndësishëm për Tiranën? Për shkak të pozicionit që ai kishte. Vetë fakti i hetimeve të kryera në SHBA tregon se ai ka marrë 225 mijë dollarë kesh në një garazh nga një shtetas shqiptaro-amerikan.

Këto lidhen me dosjen e parë që ai hapi kundër liderit të opozitës, i cili në atë kohë ishte Lulzim Basha. Ai u akuzua për lidhje me rusë, skocezë dhe kinezë dhe u godit politikisht nga të gjitha anët, duke hyrë në zgjedhjet e 2021-shit.

Rezultati ishte shumë i ngushtë dhe, sipas kësaj narrative, opozita ishte shumë afër fitores, por u ndikua nga grupe kriminale në disa zona, ku u luftua për mandate deputetësh dhe u përmbys rezultati’, u shpreh gazetari Artan Hoxha në SYRI TV.