Berisha me dy lista këshilltarësh, edhe në koalicionin “Bashkë Fitojmë” edhe te “Aleanca Liberale e Djathtë”

Kandidatët për këshillat bashkiakë të propozuar nga Sali Berisha pritet të jenë në dy lista. Një pjesë në koalicionin Bashkë Fitojmë dhe të tjerë në Aleanca Liberale e Djathtë. Kryekomisioneri Ilirian Celibashi ka regjistruar dy bashkimet e partive, por duke hequr nga lista emrin e Partisë Demokratike të krahut të drejtuar nga Sali Berisha.

Ashtu si në 6 mars të vitit të shkuar, grupimi i Sali Berishës do të regjistrohet në koalicion, por pa emrin dhe siglen e tij. “Bashkë Fitojmë” u regjistrua si subjekt zgjedhor për 14 majin, teksa Ilirian Celibashi lexoi emrat e partive pjesëmarrëse dhe gërmat nistore.

“Indrit Sefa përfaqëson PD-në në KQZ. Prej gati 1 viti është përfaqësuesi i PD-së dhe sa kohë nuk ka një dokument që provon të kundërtën, vazhdon të jetë përfaqësuesi i PD-së në KQZ. Mungon vullneti i PD-së për të qenë pjesë e këtij koalicioni. E njëjta situatë ka qenë edhe në shkurt 2022. Në konkluzion dhe në analizë të të gjithë çfarë përmenda do regjistrojmë koalicionin “Bashkë Fitojmë” me 3 parti, PL, PBDNJ dhe PDK”, tha Celibashi.

Për më shumë se 40 minuta përfaqësuesi ligjor i Rithemelimit debatoi me atë të alibajt dikur të së njëjtës forcë politike

Indrit Sefa: Nëse lexoni vendimin e KAS-it thotë që “vendimi hyn në fuqi menjëherë”. Unë jam përfaqësues i përhershëm i PD-së pranë KQZ-së. PD nuk ka bërë asnjë marrëveshje për lidhjen e koalicionit zgjedhor dhe nuk ka depozituar asnjë marrëveshje të tillë. Subjektet që kanë firmosur në emër të PD-së, nuk janë përfaqësues të Partisë Demokratike.

Altin Kaziaj (përfaqësues i koalicionit “Bashkë Fitojmë”): Kodi Zgjedhor flet për marrëveshje të dy a më shumë partive. Me shumë respekt për ju zoti Komisioner, të vazhdojmë më tej me kërkesën tonë. Ju që thoni ‘përfaqësuesi i PD’ ende nuk e keni regjistruar PD-në në zgjedhje.

Franc Nuri (përfaqësuesi i Berishës): Zotit Sefa i mungon legjitimiteti për të ndërhyrë në këtë pikë të rendit të mbledhjes. Marrëveshja për koalicion ka qenë plotësisht në përputhje të Kodit Zgjedhor. KAS mori një vendim skandaloz, ne e kemi ankimuar vendimin dhe po punojmë për ankimimin në Kolegjin Zgjedhor.

Madje Indrit Sefa dhe Franc Nuri nuk i kursyen batutat ndaj njëri-tjetrit.

Komisioni Qendror i Zgjedhjeve regjistroi edhe koalicionin “Aleanca Liberale e Djathtë”. Edhe ky bashkim mbështetet në 3 mandatet e deputetëve të Partisë Demokratike.

Në Kuvend Edmond Spaho është deklaruar se i përket Partisë Bashkimi Demokrat, Tritan Shehu Bashkimit Liberal Demokrat dhe Luan Baçi Ballit Kombëtar Demokrat.

Duket se edhe në këtë koalicion Lista e Këshillave Bashkiakë do të ketë në pjesën dërrmuese propozimeve të Sali Berishës dhe emra të tjerë do të jenë në koalicionin “Bashkë fitojmë”.

sali berisha zgjedhjet e 14 majit zgjedhjet vendore zgjedhjet kqz ilirjan celibashi celibashi franc nuri indrit sefa koalicionet