“Arsyetim skandaloz i prokurorisë për protestuesit” - Avokatja zbulon prapaskenat e seancës gjyqësore

Gjykata e Tiranës ka vendosur masën e sigurisë “detyrim paraqitjeje” për të gjithë personat e arrestuar gjatë protestës së opozitës, duke rrëzuar kërkesën e prokurorisë për masa më të ashpra si “arrest me burg” për dy prej tyre dhe “arrest shtëpie” për tre të tjerë.

Në një prononcim pas seancës gjyqësore, njëra prej avokateve mbrojtëse, Eda Grimçi zbuloi detaje nga procesi, duke e cilësuar argumentin e organit të akuzës si të paprecedentë dhe të turpshëm.

Sipas saj, pas shqyrtimit të dosjes, pala mbrojtëse konstatoi se nuk ekzistonte asnjë provë specifike që të lidhte individët e ndaluar me veprime konkrete të dhunshme.

Arsyeja e prokurorisë për të kërkuar masa më të rënda për pesë protestues ishte fakti se ata “identifikoheshin si persona që merrnin gjithmonë pjesë në protestat e opozitës”. “Pra, krimi që këta kishin bërë më shumë se të tjerët ishte se ishin persona shumë aktivë që gjithmonë merrnin pjesë në protestat e opozitës,” deklaroi avokatja, duke shtuar se ky argument u kundërshtua me forcë pasi pjesëmarrja në protesta është një e drejtë themelore e sanksionuar me Kushtetutë.

Gjykata nuk e pranoi këtë arsyetim të prokurorisë dhe caktoi masën e “detyrimit të paraqitjes” për të gjithë, por e cilësoi arrestimin fillestar në flagrancë si të ligjshëm, duke u bazuar vetëm në raportet e shërbimit të oficerëve të policisë. Mbrojtja ligjore ka bërë të ditur se do ta apelojë vendimin, duke kërkuar që arrestimi të shpallet tërësisht i paligjshëm, me argumentin se raportet e shërbimit nuk përbëjnë provë tej çdo dyshimi të arsyeshëm, duke iu referuar praktikave të gjykatave më të larta.

Gjatë seancës u ngritën edhe pretendime për dhunë dhe shkelje procedurale. U konstatua se disa prej protestuesve ishin marrë në pyetje dhe u ishte komunikuar arresti pa praninë e një avokati. Për më tepër, u pohua se katër prej të ndaluarve ishin dhunuar fizikisht, një fakt që ishte denoncuar më herët dhe u konfirmua nga vetë protestuesit para trupit gjykues.

Duke u bazuar në këto fakte, përfaqësuesit ligjorë të Partisë Demokratike njoftuan se do të ndërmarrin hapa të mëtejshëm ligjorë, duke përgatitur kallëzime penale kundër forcave të rendit për keqtrajtim dhe dhunë të ushtruar ndaj protestuesve.