Teksa rriten tensionet në Mesdheun Lindor dhe Ankaraja po përgatitet të kërkojë për depozita hidrokarburesh në det, Athina po reagon diplomatikisht.

Mediat greke raportojnë se ministri i Punëve të Jashtme, Nikos Dendias, i ka kërkuar Komisionerit për Zgjerimin, Oliver Varhei, ta ndëshkojë Turqinë duke e përjashtuar nga unioni doganor me BE-në.

Në letrën e tij, Dendias akuzon palën turke se e ka shkelur marrëveshjen me tarifat e paparashikuara dhe masat e veta legjislative, prandaj nuk duhet të përfitojë më nga korridori ekonomik që e shfrytëzon nga viti 1995.

Ndër të tjera, ministri Dendias u ka bërë të qartë një sërë aktorësh ndërkombëtarë për qasjen provokuese dhe destabilizuese të Turqisë.

Për situatën në Mesdheun Lindor, Athina mësohet se ka informuar sekretarin e përgjithshëm të OKB-së, Sekretarin amerikan të Shtetit, Majk Pompeo, kryediplomatin e BE-së, Xhozep Borel, Organizatën Ndërkombëtare të Detit dhe Aviacionit Civil dhe agjencinë e mbrojtjes kufitare, FRONTEX.

Rolin destabilizues të Turqisë në rajon e pranoi një ditë më parë edhe ministri i Jashtëm gjerman në një intervistë për gazetën “Kathimerini”.

Bashkimi Europian mësohet se i ka lënë Ankarasë kohë deri në dhjetor për t’u tërhequr nga veprimet e njëanshme dhe për të evituar sanksionet.

Pala turke thotë se është në të drejtën e saj të analizojë terrenin detar për depozita gazi dhe nafte edhe pse ato ndodhen afër ishujve greko-qipriotë.

Nëse do zbulohen sasi të konsiderueshme, Ankaraja thotë se do ndërmarrë operacionet e nxjerrjes së hidrokarbureve pranë ishullit Kastellorizo.