Zhvillimi cilësor i arsimit të lartë, prioritet i Kinës deri në vitin 2030

Kina synon të ndërtojë deri në vitin 2030 një sistem arsimor me cilësi të lartë, duke e vendosur arsimin në qendër të strategjisë së saj për zhvillimin kombëtar. Ky është objektivi kryesor i Planit të 15-të Pesëvjeçar për Zhvillimin e Arsimit, të publikuar së fundmi nga qeveria kineze.

Plani parashikon përmirësimin e cilësisë në të gjitha nivelet e arsimit, me theks të veçantë te arsimi i lartë, kultivimi i talenteve inovative, zhvillimi i kërkimit shkencor dhe përdorimi i inteligjencës artificiale në procesin mësimor. Njëkohësisht, synohet zgjerimi i bashkëpunimit ndërkombëtar dhe modernizimi i sistemit arsimor.

Sipas Ministrisë së Arsimit, Kina ka ndërtuar sistemin më të madh të arsimit bazë në botë, me rreth 430 mijë institucione arsimore, 220 milionë nxënës dhe 15.77 milionë mësues. Tashmë fokusi po zhvendoset nga zgjerimi i aksesit drejt rritjes së cilësisë së arsimit.

Ndërkohë, interneti është shtrirë në të gjitha shkollat e vendit, duke krijuar mundësi që edhe shkollat rurale të zhvillojnë mësim në kohë reale me ato urbane. Krahas përmirësimit të rezultateve akademike, shkollat po promovojnë edhe zhvillimin e gjithanshëm të nxënësve përmes aktiviteteve praktike, shkencore, sportive dhe edukative.

Përmes këtyre reformave, Kina synon të ndërtojë një sistem arsimor modern dhe konkurrues në nivel ndërkombëtar, duke e konsideruar arsimin një nga shtyllat kryesore të zhvillimit të saj afatgjatë.