Polemika në SHBA pas v*asjes së një emigranti nga ICE/ FBI nis hetimet

Një operacion i Agjencisë Amerikane të Imigracionit dhe Doganave (ICE) në Hjuston përfundoi në mënyrë tragjike, pasi një agjent federal qëlloi për vdekje një shtetas meksikan gjatë një tentative arrestimi. Ngjarja ka ngritur pikëpyetje të reja mbi përdorimin e forcës nga autoritetet federale dhe tashmë është vënë nën hetim nga Byroja Federale e Hetimit (FBI).

Sipas ICE, incidenti ndodhi rreth orës 06:50 të mëngjesit, kur agjentët ndaluan Lorenzo Salgado Araujo, të cilin e identifikuan si një shtetas meksikan pa dokumente të rregullta dhe objekt të një operacioni të synuar për zbatimin e ligjit të emigracionit.

Autoritetet pretendojnë se gjatë përpjekjes për arrestim, Salgado Araujo tentoi të përplaste me automjet një oficer të ICE-së. Sipas agjencisë, agjenti hapi zjarr në kushtet e vetëmbrojtjes, duke i shkaktuar vdekjen shoferit.

Megjithatë, familjarët kundërshtojnë këtë version. Djali i viktimës, Ronaldo Salgado, deklaroi se babai i tij kishte dalë herët atë mëngjes për të kërkuar punëtorë në zonë dhe nuk përbënte kërcënim.

Pas incidentit, ICE njoftoi se hetimi i plotë i ngjarjes i është kaluar FBI-së, e cila do të verifikojë rrethanat e përdorimit të armës nga agjenti federal.

Deri tani, ICE nuk ka publikuar prova, pamje filmike apo materiale të tjera që mbështesin versionin e saj për ngjarjen. Rasti ka rikthyer në vëmendje incidente të ngjashme të ndodhura gjatë këtij viti, ku përshkrimet fillestare të autoriteteve federale për përdorimin e forcës janë vënë më pas në dyshim nga pamje video dhe dëshmi të pavarura.

Ngjarja pritet të rrisë edhe më tej debatin në Shtetet e Bashkuara mbi mënyrën e zhvillimit të operacioneve të emigracionit dhe përdorimin e forcës vdekjeprurëse nga agjentët federalë.