OBSH: Nevojiten të paktën 7 miliardë dollarë për të rindërtuar sistemin shëndetësor të Gazës

Organizata Botërore e Shëndetësisë (OBSH) deklaroi sot se për rindërtimin e sistemit shëndetësor në Rripin e Gazës do të nevojiten të paktën 7 miliardë dollarë, ndërsa paralajmëroi se situata humanitare mbetet jashtëzakonisht e rëndë.

“Asnjë spital në Gaza nuk funksionon plotësisht dhe vetëm 14 nga 36 janë ende në gjendje të ofrojnë ndihmë mjekësore. Ka mungesë serioze barnash dhe personeli shëndetësor bazik,” tha drejtori i përgjithshëm i OBSH-së, Tedros Adhanom Ghebreyesus, në një deklaratë për gazetarët. Ai shtoi se kostoja totale e rindërtimit të sistemit shëndetësor mund të arrijë ose të tejkalojë 7 miliardë dollarë.

Ndihma humanitare “e pamjaftueshme” — uria vazhdon

Tedros theksoi se ndihma humanitare që hyn në Gaza është e pamjaftueshme dhe nuk ka arritur të përmirësojë situatën në territorin palestinez të shkatërruar nga lufta.

“Uria është ende e pranishme, pasi nuk po hyn sasi e mjaftueshme ushqimesh në Gaza që nga nisja e armëpushimit. Situata mbetet katastrofike,” shtoi ai.

OBSH evakuon 41 fëmijë nga Gaza

Për herë të parë që prej hyrjes në fuqi të armëpushimit dy javë më parë, OBSH ka arritur të evakuojë 41 fëmijë të sëmurë rëndë dhe të plagosur nga Rripi i Gazës në një zonë të sigurt, së bashku me 145 persona shoqërues.

Në një postim në platformën X, Tedros shkroi:
“Rreth 150 mijë pacientë të tjerë ende presin miratimin për t’u trajtuar jashtë Gazës. Ne u bëjmë thirrje vendeve të tregojnë solidaritet dhe të hapin të gjitha rrugët për evakuimin e pacientëve.”

OBSH nuk zbuloi vendet ku do të trajtohen fëmijët për arsye sigurie, ndërsa çdo lëvizje e pacientëve kërkon miratimin e autoriteteve izraelite, të cilat kontrollojnë hyrjet dhe daljet nga Gaza.