Merz: Gjermania e gatshme të blejë sisteme amerikane “Patriot” për Ukrainën

Gjermania po planifikon të blejë sisteme të mbrojtjes ajrore “Patriot” të prodhuara në SHBA për t’i dërguar Ukrainës, tha sot kancelari Friedrich Merz, ndërsa Kievi kërkon urgjentisht mbrojtje më të fortë ajrore – mes përshkallëzimit të sulmeve ruse me raketa dhe dronë.

“E diskutova këtë me presidentin Donald Trump të enjten e kaluar dhe gjithashtu i kërkova atij të na furnizonte me këto sisteme”, tha Merz në konferencën për rindërtimin e Ukrainës sot në Romë.

“Ministrat e Mbrojtjes të të dy vendeve po negociojnë një marrëveshje të mundshme, por ende nuk është marrë një vendim përfundimtar”, tha Merz.

Udhëheqësi gjerman vuri në dukje se SHBA-ja kishte nevojë për disa nga sistemet “Patriot” të disponueshme për mbrojtjen e tyre, pa specifikuar se sa sisteme synonte të blinte Berlini.

Këtë javë, Trump, duke shprehur pakënaqësinë e tij për refuzimin e presidentit rus Vladimir Putin për t’u angazhuar në mënyrë kuptimplote në negociatat e paqes, tha se kishte miratuar një dërgesë të armëve mbrojtëse në Ukrainë.

Më vonë ai tha se dëshira e Ukrainës për një sistem shtesë të mbrojtjes ajrore “Patriot” do të shqyrtohej, gjithashtu.

Gjermania, e cila gjithashtu përdor raketat “Patriot”, ka furnizuar Ukrainën me disa sisteme të mbrojtjes ajrore, por raketat “Patriot” konsiderohen si më modernet dhe më efektivet.

Sistemi është në gjendje të interceptojë avionë, raketa balistike në një distancë prej rreth 100 kilometrash dhe në një lartësi deri në 30 kilometra.