Kryebashkiakja 'thyen' tabu në Japoni/ Shoko Kawata merr lejen e parë të lindjes në detyrë

Shoko Kawata, kryebashkiakja e qytetit Yawata në Japoninë perëndimore, ka hyrë në histori duke u bërë zyrtarja e parë vendore në detyrë në Japoni që merr leje lindjeje. Vendimi i saj ka hapur një debat të gjerë mbi barazinë gjinore, rolin e grave në politikë dhe vështirësitë që përballen ato në poste drejtuese.

Kawata, e cila drejton një qytet me rreth 69 mijë banorë, kishte bërë histori edhe më parë. Në vitin 2023, në moshën 33-vjeçare, ajo u zgjodh kryebashkiakja më e re femër në historinë e Japonisë. Por kur vendosi të krijonte familje, u përball me një problem institucional, ligji parashikonte leje lindjeje për punonjësit e bashkisë, por jo për drejtuesit e zgjedhur vendorë.

Për këtë arsye, kryebashkiakja u detyrua të krijonte vetë një mënyrë zbatimi për lejen e saj të lindjes. Ajo pritet të bëhet nënë në shtator dhe do të mungojë për një periudhë të përcaktuar, ndërsa detyrat e saj do të menaxhohen sipas rregullave të vendosura për këtë rast.

“U habita kur kuptova se isha kryebashkiakja e parë që merrja leje lindjeje. Kjo tregoi se gratë e reja dhe gratë në përgjithësi kanë qenë ende të pakta në poste të tilla drejtuese”, u shpreh Kawata.

Rasti i saj ka nxjerrë në pah hendekun gjinor në politikën japoneze. Pavarësisht zgjedhjes së kryeministres së parë femër në vend, përfaqësimi i grave në nivelet e larta politike mbetet i ulët. Sipas raportit të Forumit Ekonomik Botëror për hendekun gjinor, Japonia renditet në vendin e 118-të nga 148 vende, ndërsa në fuqizimin politik ndodhet në vendin e 125-të.

Kawata lidhet edhe me një debat më të gjerë për krizën demografike të Japonisë, ku rënia e lindjeve dhe plakja e popullsisë janë ndër sfidat kryesore të vendit. Ajo kërkon që shoqëria të krijojë kushte ku njerëzit, edhe ata në poste drejtuese, të mos kenë frikë të krijojnë familje.

Vendimi për të marrë leje me pagesë të plotë ka sjellë edhe kritika. Disa qytetarë e kanë mbështetur të drejtën e saj për të pushuar pas lindjes, por kanë kundërshtuar përfitimin e pagës së plotë gjatë mungesës. Megjithatë, mbështetësit e saj e shohin këtë si një hap drejt një modeli të ri ku gratë mund të kombinojnë karrierën politike me jetën familjare.