BM prodhon dronin që do të përdoret në konfliktet e së ardhmes

Forcat e armatosura britanike po testojnë në mënyrë intensive Nyan, një sistem ajror pa pilot (dron) i kategorisë “One-Way Effector” (OWE), i projektuar për përdorim si në operacionet detare, ashtu edhe në ato tokësore, shkruan il giornale It.

Pas “mësimeve të nxjerra nga lufta në Ukrainë”, Marina Mbretërore (Royal Navy) dhe Ushtria Britanike (British Army) kanë vendosur të zhvillojnë dhe testojnë kapacitete të reja të përdorshme në distancë për t’u përballur me skenarët e ardhshëm, duke u fokusuar te efikasiteti dhe shumëfunksionaliteti.

Nyan OWE është një dron i vogël me hapje krahësh prej 2,9 metrash, me një konfigurim që i ngjan një avioni të vogël stealth të gjeneratës së re. Ai është projektuar për të kryer sulme precize si ndaj objektivave në tokë, ashtu edhe në det.

I ndërtuar me fibër karboni dhe i pajisur me një motor mikro-turbinë, Nyan mund të arrijë një shpejtësi rreth 450 km/orë dhe ka një rreze veprimi prej 150–200 kilometrash.

Ai niset me katapultë dhe operon në mënyrë autonome duke ndjekur koordinata të programuara paraprakisht përmes navigimit inercial dhe satelitor, duke ulur ndjeshëm cenueshmërinë ndaj ndërhyrjeve elektronike.

Droni mund të transportojë një ngarkesë prej rreth 20 kilogramësh, e destinuar zakonisht për një kokë luftarake shpërthyese, dhe është konceptuar si një “dron kamikaz” për goditjen e objektivave fikse.

Sipas disa burimeve, mund të ekzistojë edhe një variant i pajisur me sensorë elektro-optikë dhe algoritme të inteligjencës artificiale, të aftë të identifikojnë objektivin në mënyrë autonome gjatë fazës përfundimtare të sulmit.

I zhvilluar nga Callen-Lenz, kompani e grupit BAE Systems, ky dron i ri u lëshua për herë të parë nga një njësi detare, anija eksperimentale e Marinës Mbretërore XV Patrick Blackett, ndërsa ndodhej në brigjet jugore të Anglisë gjatë stërvitjes “Neptune Reach”.

Kjo stërvitje e përbashkët bindi gjithashtu Ushtrinë Britanike dhe Forcat Ajrore Mbretërore (Royal Air Force) në kuadër të “Project Vantage”, një program që synon përshpejtimin e testimit dhe vlerësimit të dronëve sulmues, të cilët gjatë pesë viteve të fundit kanë marrë një rol qendror në konfliktet bashkëkohore dhe, sipas ekspertëve ushtarakë, do të bëhen edhe më të rëndësishëm në luftërat e së ardhmes.

Droni Nyan ishte testuar më parë me sukses nga ushtria britanike gjatë një stërvitjeje të simuluar në Estoni, për të verifikuar kapacitetet e goditjes me rreze të gjatë që Mbretëria e Bashkuar mund t’u ofrojë aleatëve të NATO-s në kontinent, në një skenar ku aleanca do të përballej me tensione në kufirin lindor.

Shërbimet evropiane të inteligjencës vazhdojnë të monitorojnë dhe të shprehin shqetësime për aktivitete të mundshme armiqësore nga Moska.

Ky dron njëdrejtimësh, i cili mund të vendoset së shpejti në mbrojtje të Mbretërisë së Bashkuar dhe të NATO-s, bashkon përvojën e fituar nga Marina dhe Ushtria Britanike.

Fillimisht, këto forca trajnuan forcat e armatosura ukrainase, ndërsa më pas, pas viteve të luftës, përfituan nga përvoja praktike e fituar në fushën e betejës, në një konflikt ku janë përdorur gjerësisht armë dhe taktika të reja luftarake.

Këto mësime po shfrytëzohen për të zhvilluar dhe përdorur në mënyrë efektive të njëjtin lloj dronësh sulmues, të aftë të lëshohen si nga anijet luftarake ashtu edhe nga platformat tokësore.