Vdes aktorja e rrëmbyer nga Koreja e Veriut

Një aktore e Koresë së Jugut, e cila ka qenë rrëmbyer nga Koreja e Veriut dhe u detyrua të bënte filma për këtë shtet, ka vdekur në moshën 92-vjeçare.

Choi Eun-hee ishte aktorja më e mirë në Korenë e Jugut, kur u rrëmbye nën urdhërin  e udhëheqësit të atëhershëm Kim Jong-il në fund të viteve 1970.

Ish-bashkëshorti i saj, një regjizor i njohur gjithashtu u rrëmbye disa muaj më vonë. Por arritën që të arratiseshin.

Koreja e Veriut ka mohuar gjithmonë rrëmbimin e çiftit, duke thënë se ata kishin kërkuar strehim atje.

Aktorja Choi vdiq të hënën pasdite në një spital në Korenë e Jugut.

Lajmi është konfirmuar nga djali i saj, regjizori Shin Jeong-gyun. "Nëna ime ndërroi jetë kur shkoi në spital për dializën e veshkave,"-tha ai.

Rrëmbimi dhe një film i ri

E lindur në vitin 1926 në provincën Gyeonggi të Koresë së Jugut, zonja Choi filloi karrierën e saj të filmit në vitin 1947.

Ajo dhe bashkëshorti i saj, Shin Sang-ok arritën që të bëheshin regjisorët më të njohur dhe yjet e filmit të Koresë së Jugut.

Por nga fundi i viteve 1970, çifti u divorcua dhe karriera e Choi pësoi një rënie.

Gjatë kësaj kohe një biznesmen nga Hong Kong i erdhi me një propozim për të formuar një kompani filmash që do të risillte famën e saj.

Sipas një libri "A Kim Jong-il Production", asaj iu ishte mbushur mendja për të shkuar në Hong Kong. Sapo kishte mbërritur në Hong Kong, ajo u rrëmbye dhe u vu në gjumë me qetësues nga disa burra.

Tetë ditë më vonë ajo ishte në Phenian në një vilë luksoze që ruhej vazhdimisht.

Pavarësisht divorcit, Shin dhe ish-bashkëshortja e tij kishin mbetur miq dhe ai shkoi në Hong Kong për ta kërkuar.

Edhe ai u rrëmbye më vonë.

Kim thuhej se ishte një adhurues i filamve të Hollywood. Ai kishte shpresuar se prania e çiftit në veri mund të ndihmonte industrinë e filmit të konkurronte në skenën ndërkombëtare.

Pas tetë vitesh, çifti fitoi besimin e zotit Kim dhe u lejuan të udhëtonin në Vjenë për të promovuar filmat e tyre.

Por në Vjenë, ata kërkuan azil politik në Ambasadën Amerikane.

Ata u kthyen në Korenë e Jugut më vonë dhe Shin vdiq në vitin 2006.

Përralla e çuditshme ka kapur audiencat anembanë globit.

Në vitin 2016, një film me titull "Të dashurit dhe despoti" u shfaq premierë mbi jetën e çiftit, pasi u rrëmbyen dhe u dërguan në Korenë e Veriut.