Bilanc lufte në Brazil, arbitri nxjerr 10 herë kartonin e kuq

Futbollistët brazilianë janë të njohur për spektaklin që japin në fushën e lojës, por kjo nuk u pa aspak në ndeshjen mes Vitorias dhe Bahias.

Pas një pjese të parë të tensionuar ku arbitri ndëshkoi 6 futbollistë me karton të verdhë dhe me golin e Denilsion për vendasit e Vitorias, situata u përkeqësua në 45 minutat e dyta.

Në minutën e 50 u akordua një 11 metërsh në favor të Bahias dhe në këtë moment shpërtheu "çmenduria"  kur Vinicius festoi golin e shënuar duke vallëzuar përpara tifozerisë vendase.

Nervozizmi ishte kaq i madh sa futbollistët e të dyja skuadrave e kthyen fushën e lojës në një ring boksi duke goditur njëri-tjetrin.

Ndeshja rinisi me 16 minuta vonesë ndërkohë që arbitri filloi të marrë masat e tij për të kthyer qetësinë në fushë duke ndëshkuar 10 futbollistë me karton të kuq; 5 kartona për lojtarët e Vitorias dhe 5 për të Bahias mes të cilëve ishte edhe Vinicius, por edhe dy lojtarë stoli. Një bilanc i vërtetë lufte.