VR*TET F*SHNJA NË HEBRON/ Fëmija 7-muajshe u q*llua nga forcat izraelite, p*gosen prindërit

Një foshnjë palestineze 7-muajshe u vra nga të shtënat e ushtrisë izraelite në Hebron, në Bregun Perëndimor. Gjatë incidentit mbetën të plagosur edhe nëna dhe babai i saj. Ushtria izraelite tha se ushtarët dyshuan se automjeti po afrohej me shpejtësi drejt tyre, por hetimi paraprak tregoi se të plagosurit ishin civilë.

Një foshnjë palestineze vetëm shtatë muajshe ka humbur jetën, ndërsa prindërit e saj janë plagosur nga të shtënat e ushtrisë izraelite në qytetin e Hebronit, në Bregun Perëndimor të pushtuar.

Sipas Ministrisë Palestineze të Shëndetësisë, viktima është Sam Fahd Abu Haikal, i cili ndërroi jetë në vendngjarje. Nëna dhe babai i tij u transportuan në spital me plagë nga armët e zjarrit dhe ndodhen jashtë rrezikut për jetën.

Familjarët tregojnë se po udhëtonin me automjet pranë pikës së kontrollit 17, në zonën Tel Rumeida, kur vunë re automjete dhe ushtarë izraelitë në distancë. Sipas gjyshes së foshnjës, familja ndaloi mjetin, por pak çaste më vonë u dëgjuan të shtëna drejt tyre.

Ajo deklaroi se fillimisht menduan se bëhej fjalë për të shtëna paralajmëruese, por një plumb goditi foshnjën në fytyrë dhe kokë. I njëjti plumb plagosi edhe nënën në faqe, ndërsa babai pësoi një dëmtim në dorë.

Nga ana tjetër, ushtria izraelite tha se një ushtar hapi zjarr pasi kishte perceptuar se automjeti po lëvizte me shpejtësi drejt forcave të saj gjatë një operacioni në zonë.

Megjithatë, një hetim paraprak i ushtrisë arriti në përfundimin se personat e plagosur ishin civilë të papërfshirë në incident. Autoritetet ushtarake njoftuan se rasti po shqyrtohet dhe se gjetjet do t’u dorëzohen institucioneve përgjegjëse.

Ngjarja ndodhi në Tel Rumeida, një nga zonat më të tensionuara të Hebronit, ku kolonët izraelitë jetojnë nën mbrojtje të fortë ushtarake mes popullsisë palestineze. Përplasjet dhe incidentet e dhunshme në këtë territor vazhdojnë të mbeten një burim i vazhdueshëm tensioni në konfliktin izraelito-palestinez.