Japonia planifikon 10 milionë robotë humanoidë deri në 2040, strategjia për të përballuar mungesën e punëtorëve

Japonia ka miratuar një strategji kombëtare ambicioze që synon të vendosë rreth 10 milionë robotë humanoidë deri në vitin 2040, në një përpjekje për të përballuar mungesën e theksuar të fuqisë punëtore dhe për të ruajtur ritmin e zhvillimit ekonomik. Projekti mbështetet nga qeveria japoneze dhe kompani të mëdha teknologjike si Sony, Honda, SoftBank dhe NEC.

Plani, i njohur si Noetra, parashikon përdorimin e robotëve në 18 sektorë të ndryshëm, duke përfshirë industrinë ushqimore, kujdesin shëndetësor, prodhimin industrial dhe menaxhimin e fatkeqësive natyrore. Për realizimin e tij do të krijohet një qendër kombëtare e robotikës e bazuar në inteligjencën artificiale, e cila do të merret me kërkimin shkencor, zhvillimin teknologjik dhe trajnimin e specialistëve.

Qeveria japoneze ka planifikuar të investojë rreth 1 trilion jenë, ose afërsisht 5.4 miliardë euro, gjatë pesë viteve të ardhshme për të mbështetur zbatimin e projektit. Synimi është që robotët të ndihmojnë veçanërisht në sektorët ku mungesa e punonjësve është bërë kritike.

Sipas ministrit japonez të Ekonomisë, Tregtisë dhe Industrisë, Ryosei Akazawa, Japonia synon të bëhet lider global në robotikën e avancuar duke shfrytëzuar përvojën dhe të dhënat e grumbulluara në fusha si kujdesi për të moshuarit, industria prodhuese, reagimi ndaj katastrofave dhe çmontimi i centralit bërthamor të Fukushimës.

Ndryshe nga inteligjenca artificiale gjeneruese, e cila krijon përmbajtje dixhitale, projekti fokusohet te e ashtuquajtura “inteligjencë artificiale fizike”, që u mundëson robotëve të veprojnë në mënyrë autonome në mjedisin real.

Autoritetet japoneze shpresojnë se ky transformim do të ndihmojë ekonominë të përballojë plakjen e popullsisë dhe mungesën e punëtorëve, ndërsa vendi synon të konkurrojë me fuqitë e tjera teknologjike, veçanërisht Kinën, në zhvillimin e robotikës dhe inteligjencës artificiale.