“INSEKTET” ROBOTË! Jo më fantashkencë, realitet premtues teknologjik

Insektet robotike nuk janë më pjesë e fantashkencës.

Ato tashmë janë realitet dhe po zhvillohen me ritme shumë më të shpejta sesa pritej, duke u shndërruar në një nga teknologjitë më premtuese të dekadës.

Këta mikro-robotë po përdoren në operacione kërkim-shpëtimi, bujqësi inteligjente, monitorim mjedisor, inspektime industriale dhe aplikime të sigurisë.

Nga RoboBee i Universitetit të Harvardit, te mikro-robotët e MIT dhe projektet e avancuara të EPFL në Zvicër, shkencëtarët po ndërtojnë robotë që imitojnë sjelljen e insekteve reale për të lëvizur në hapësira shumë të ngushta dhe të rrezikshme për njerëzit.

Disa prej tyre janë testuar edhe në situata emergjente, për zbulimin e shenjave të jetës nën rrënoja.

Një drejtim i ri kërkimor është përdorimi i modeleve të trurit të insekteve, përfshirë rrjetet nervore “spiking”, që u japin këtyre robotëve aftësi më të mira navigimi dhe konsum shumë të ulët energjie.

Projekte si InsBots synojnë edhe ndërveprimin me insekte reale për kontroll biologjik të dëmtuesve, ndërsa Kilobotët demonstrojnë sjellje kolektive, duke bashkëpunuar për transport apo ndërtim, njësoj si kolonitë e insekteve.

Megjithëse teknologjia është në fazë të avancuar kërkimi me përdorime reale, sfidat mbeten të mëdha: autonomia energjitike, kontrolli i plotë inteligjent dhe ndikimet etike e mjedisore. Megjithatë, ekspertët janë të një mendimi se insektet robotike do të kenë një rol kyç në teknologjitë e së ardhmes.

ijpg

insektet robot2