VIDEO/ Haxhiu vendos afatin, Kuvendi i Kosovës mblidhet në gusht, nis gara për presidentin e ri

Ushtruesja e detyrës së Presidentes së Kosovës, Albulena Haxhiu, ka paralajmëruar se seanca konstituive e Kuvendit të Kosovës pritet të mbahet në fillim të muajit gusht.

Haxhiu bëri të ditur se vendimi për shtyrjen e thirrjes së seancës lidhet me përpjekjet për t’u lënë kohë partive politike që të arrijnë një marrëveshje për krijimin e institucioneve të reja dhe për të shmangur një ngërç institucional.

Sipas saj, afati kushtetues për thirrjen e seancës konstituive përfundon më 7 gusht, ndërsa pas konstituimit të Kuvendit nis edhe afati për zgjedhjen e presidentit të ri të Kosovës.

Haxhiu ka vlerësuar takimet mes subjekteve politike të zhvilluara me iniciativë të kryetarit të Lëvizjes Vetëvendosje, Albin Kurti, ndërsa ka kritikuar pezullimin e negociatave nga Lidhja Demokratike e Kosovës.

Ajo deklaroi se qytetarët e Kosovës, përmes votës së tyre, kanë dhënë një mesazh kundër bllokadave politike dhe se vendit i nevojitet një president me mandat të plotë pesëvjeçar.

Data dhe ora e saktë e seancës konstituive pritet të bëhen publike javën e ardhshme. Në këtë seancë pritet të marrin pjesë të gjithë 120 deputetët e Kuvendit të Kosovës, ndërsa vendi hyn në një periudhë vendimtare për formimin e institucioneve të reja.