Kodi zgjedhor aktual/ Maliqi: Turp e skandal! Vetëm përfaqësues nuk është ky kod!

Deputeti Lefter Maliqi ka reaguar ashpër ndaj Kodit Zgjedhor aktual, duke e cilësuar atë të papërshtatshëm dhe të dëmshëm për përfaqësimin demokratik në vend. Ai ka kërkuar ndryshime të menjëhershme, duke propozuar lista të hapura ose një sistem mazhoritar.

Në reagimin e tij, Maliqi shprehet se nga 140 deputetë në Kuvend, vetëm një pjesë e vogël arrijnë të zgjidhen përmes votës së drejtpërdrejtë, ndërsa pjesa tjetër, sipas tij, nuk përfaqëson realisht vullnetin e qytetarëve.

Ai e cilëson Kodin Zgjedhor si një sistem që ka deformuar përfaqësimin politik dhe ka ndikuar në dobësimin e institucioneve demokratike, duke prodhuar, sipas tij, deputetë të shkëputur nga vota e qytetarëve.

Maliqi kërkon që vota të jetë plotësisht e drejtpërdrejtë dhe transparente, duke theksuar se vetëm zgjedhjet me lista të hapura ose sistemi mazhoritar mund të rikthejnë besimin e qytetarëve në procesin zgjedhor.

Ai shprehet gjithashtu se në një sistem të drejtë zgjedhor, çdo politikan duhet të përballet drejtpërdrejt me votën e qytetarëve dhe të pranojë rezultatin e saj.

Në fund të reagimit të tij, Maliqi ka mbështetur idenë e ndryshimeve të thella politike dhe zgjedhore, duke theksuar se vetëm një reformë e plotë mund të sjellë, sipas tij, përfaqësim real dhe funksional në Kuvend.