Afera Rama-McGonigal, Berisha thirrje Kryeministrit për dorëheqje: Një demon dhe kalbësirë

"I kërkoj në mënyrë të prerë Edi Ramës, largohu menjëherë nga pushteti, alternativë tjetër nuk ka!"

Zbulimit i skandalit me ish-shefin e FBI, Charles McGonigal, dhe lidhjet e tij me kryeministrin Rama kanë riaktivizuar aksionin politik të opozitës.

Në një konference urgjente nga selia blu, kreu i Partisë Demokratike Sali Berisha i bëri thirrje kryeministrit Rama të japë dorëheqjen e menjëhershme.

Berisha tha se opozita ka hyrë në betejën finale me Edi Ramën, duke i kërkuar në mënyrë të prerë largimin nga pushteti. 

Berisha: Jam këtu për të kërkuar, largimin e menjëhershëm, dorëheqjen e menjëhershme të Edi Ramës nga detyra e kryeministrit. Jam këtu për të deklaruar se për PD-në, popullin opozitar, është absolut dhe i panegociueshëm. Prevalon, mbizotëron mbi çdo gjë tjetër. Pa largimin e këtij armiku të egër, të lirisë, identitetit dhe interesit të shqiptarëve, nuk ka dhe nuk mund të ketë asnjë zhvillim tjetër. Demokrate dhe demokratë kudo që janë, në Shqipëri dhe jashtë saj, duhet të mobilizohen për betejën finale me këtë kalbësirë, monstër, demon të pushtetit.

Duke e cilësuar aferën Rama-McGonigal si kryeafera e planetit, Berisha akuzoi Edi Ramën se duke paguar një prej figurave më të fuqishme të FBI, synoi shkatërrimin e Partisë Demokratike. 

Berisha: Edi Rama me aktin e tij, ndaj PD-së me angazhimin e njërit prej figurave më të fuqishme të zbulimit të vendit partner, për falsifikim, manipulim dhe luftë të hapur ndaj PD-së, tregon se ai meriton çdo dënim, ndëshkim dhe tregon se demokratet dhe demokratët do të ngrihen në një betejë vendimtare, kësaj here për shpëtimin e Shqipërisë nga armiku më i egër që shqiptarët kanë pasur pas Enver Hoxhës, në historinë e tyre. Sot afera Rama-McGonigal, është kryeafera e planetit. Një dramë e tmerrshme në fushën e sigurisë që zhvillohet sa në SHBA, po kaq edhe në Tiranë, që ka për autor, Charls McGonigal, njeriun kryesor të kundërzbulimit në SHBA, që kishte njohuri të tmerrshme, të jashtëzakonshme për sigurinë e vendit të madh. Dhe ky njeri i ofrohet Edi Ramës për të shkatërruar opozitën shqiptare. Këtë njeri, Edi Rama pasi grabiti zgjedhjet e 2017, e kontrakton për t'i dhënë opozitës goditjen e mëshirës.

Beteja këtë herë do të jetë pa kthim deri në largimin e Edi Ramës, tha Berisha, duke paralajmëruar nisjen e protestave anti-qeveritare.

Berisha: Demokratet dhe demokratë, janë momentet më solemne, më kritike, më të rëndësishme të  jetës tuaj politike. E ardhmja e PD-së, e demokracisë shqiptare do të përcaktohet nga suksesi i betejës kundër kësaj kalbësire të pashembullt, që angazhoi në shkelmim më të paimagjinueshëm, flagrant, parimi dhe interesi të Shqipërisë dhe shqiptarëve, agjenturën, mafian ruse për shkatërrimin e pluralizmit dhe demokracisë në Shqipëri. Ne pra hymë tani në finale. Çdo luftë ka betejën finale dhe kjo që do të nisim është beteja finale në të cilën ju siguroj se ne do të fitojmë. Edhe njëherë i kërkoj Edi Ramës në mënyrë të prerë; largohu menjëherë nga pushteti. Jep dorëheqjen se alternativë tjetër nuk ka për ty. Edhe tanket Putin të vijnë në Tiranë, nuk të mbajnë në pushtet, largohu menjëherë. Edhe njëherë, demokratë dhe demokrate, ora është e jona, e një beteje që në do ta bëjmë me vendosmëri, guxim dhe përkushtim si asnjëherë tjetër më parë.

agjenti i fbi sali berisha