E thotë studimi: Të shohësh influencues duke pirë alkool i bën edhe të rinjtë të duan të pinë

Një studim i ri ka zbuluar se të shikosh influencues teksa pinë alkool në postimet në mediat sociale rrit dëshirat për konsum tek të rinjtë.

Hulumtimi, i kryer nga Rutgers Health dhe Universiteti i Harvardit dhe i botuar në JAMA Pediatrics , tregoi se ekspozimi ndaj alkoolit në mediat sociale nxit dëshirën e të rinjve për të pirë.

“Ne donim të shkonim përtej shoqërimit për të vendosur rendin kohor, domethënë, dëshira e pjesëmarrësve për të pirë lindi pasi panë përmbajtjen”, tha Jon-Patrick Allem, autori kryesor i studimit në Shkollën e Shëndetit Publik Rutgers në New Jersey.

Të rinjtë që shihnin postime nga influencues me alkool kishin dukshëm më shumë gjasa të dëshironin një pije sesa ata që shikonin postime të ngjashme nga të njëjtët influencues pa përfshirë alkool.

Studimi zbuloi se pjesëmarrësit që i perceptonin ndikuesit si shumë të besueshëm kishin gjasa dukshëm më të mëdha për të dashur të pinin.

Allem tha se asnjë nga videot nuk ishte reklamë e hapur për alkoolin. Përmbajtja e eksperimentit ishte më delikate sesa një reklamë, përshkrime të alkoolit që njerëzit i hasin çdo ditë në mediat sociale.

“Thjesht ngjarjet e jetës së përditshme për ndikuesit në video”, shtoi Allem.

Hulumtimi përfshinte 2,000 pjesëmarrës të moshës 18 deri në 24 vjeç në Shtetet e Bashkuara, të ndarë në dy grupe.

Të dy grupet panë 20 postime të simuluara në Instagram nga ndikues të stilit të jetesës: në grupin e parë, imazhe të ndikuesve që konsumonin ose shfaqnin alkool; grupi i dytë pa të njëjtët ndikues pa alkool.

Në një nga shembujt, disa pjesëmarrës panë një çift duke përgatitur darkën ndërsa pinin verë, ndërsa të tjerët panë një skenë të ngjashme në kuzhinë ku çifti po pinte çokollatë të nxehtë.

Pasi morën parasysh faktorët, përfshirë përdorimin e përditshëm të mediave sociale, konsumin e alkoolit gjatë gjithë jetës dhe ekspozimin e mëparshëm ndaj marketingut të alkoolit, studiuesit zbuluan se pjesëmarrësit që panë alkool në video kishin 73 përqind më shumë gjasa të raportonin një dëshirë më të madhe për të pirë.

Konsumi i alkoolit tek të rinjtë

Trendet e konsumit të alkoolit tek të rinjtë në Evropë tregojnë një rënie të vazhdueshme, me konsumin e përgjithshëm dhe pirjen e tepërt të alkoolit në rënie gjatë dy dekadave të fundit, sipas Projektit Evropian të Anketës Shkollore mbi Alkoolin dhe Drogat e Tjera (ESPAD).

“Dekada të tëra kërkimesh tregojnë se sa më herët që dikush pi pijen e parë, aq më shumë ka gjasa që të përjetojë probleme të lidhura me alkoolin më vonë në jetë”, tha Alex Russell, bashkautor i studimit në Shkollën Mjekësore të Harvardit.

Ai shtoi se shtyrja e fillimit të pirjes së alkoolit është një strategji kyçe parandaluese dhe, ndërsa hapësirat online si mediat sociale po formësojnë gjithnjë e më shumë sjelljet e të rinjve për pirjen e alkoolit, përpjekjet parandaluese duhet të përqendrohen edhe në këto mjedise dixhitale.