45% e rasteve të demencës mund të parandalohen me ndryshime të stilit të jetesës

Rreth 45% e rasteve të demencës mund të parandalohen ose të shtyhen në kohë përmes një stili jetese më të shëndetshëm dhe masave të thjeshta parandaluese. Ky është përfundimi i udhëzimeve të reja të publikuara nga Organizata Botërore e Shëndetësisë (OBSH) për uljen e rrezikut të rënies njohëse.

Sipas OBSH-së, aktualisht më shumë se 57 milionë njerëz në botë jetojnë me demencë, ndërsa çdo vit regjistrohen rreth 10 milionë raste të reja. Forma më e zakonshme e kësaj sëmundjeje është Alzheimeri, i cili përbën rreth 60-70 për qind të rasteve.

Edhe pse ende nuk ekziston një trajtim përfundimtar që e shëron demencën, ekspertët theksojnë se shumë faktorë rreziku mund të kontrollohen. Ndër ta përfshihen pirja e duhanit, konsumimi i tepërt i alkoolit, mungesa e aktivitetit fizik, izolimi social, ndotja e ajrit, si dhe sëmundje si hipertensioni, diabeti dhe kolesteroli i lartë.

Në rekomandimet e reja, OBSH këshillon aktivitet fizik të rregullt, ushtrime për stimulimin e trurit, përfshirje në aktivitete sociale, ushqyerje të ekuilibruar, ndërprerjen e duhanit dhe kufizimin e konsumit të alkoolit.

Gjithashtu, organizata thekson rëndësinë e kontrollit të sëmundjeve kardiometabolike dhe përdorimit të aparateve të dëgjimit kur ato janë të nevojshme, pasi problemet me dëgjimin lidhen me rritjen e rrezikut për rënie njohëse.

Nga ana tjetër, OBSH nuk rekomandon përdorimin rutinë të vitaminave B dhe E, omega-3, multivitaminave apo suplementeve minerale për parandalimin e demencës, përveç rasteve kur ekziston një mungesë e dokumentuar.

Drejtori i Përgjithshëm i OBSH-së, Tedros Adhanom Ghebreyesus, tha se udhëzimet e reja u japin vendeve rekomandime të bazuara në prova shkencore për të mbrojtur shëndetin e trurit dhe për të ulur ndikimin e kësaj sëmundjeje në shoqëri.