Sondazhi i “Reuters”: Presidenti amerikan në nivelin më të ulët historik të mbështetjes

Miratimi publik për Presidentin Donald Trump ka rënë ndjeshëm, duke arritur nivelin më të ulët që prej rikthimit në detyrë. Pakënaqësia mbi koston e lartë të jetesës dhe trajtimin e çështjes Epstein po godasin fort administratën. Sondazhi i Reuters/Ipsos sugjeron një sfidë serioze për kontrollin e Trump ndaj Partisë Republikane.

Miratimi publik për Presidentin Donald Trump ka rënë në 38%, niveli më i ulët që nga rikthimi i tij në Shtëpinë e Bardhë, sipas një sondazhi të ri Reuters/Ipsos.

Rënia lidhet kryesisht me pakënaqësinë e amerikanëve ndaj menaxhimit të kostos së lartë të jetesës dhe trajtimit të çështjes që lidhet me të ndjerin Jeffrey Epstein, kriminel i dënuar për shfrytëzim seksual.

Sondazhi katërditor, i mbyllur të hënën, vjen në një moment kur ndikimi i Trump mbi Partinë Republikane po tregon shenja dobësimi.

Dhoma e Përfaqësuesve, e kontrolluar nga republikanët, miratoi të martën një masë që detyron Departamentin e Drejtësisë të publikojë dosjet e fshehta për Epstein.

Ky hap u kundërshtua për muaj me radhë nga vetë Trump, ndërsa një prej aleateve të tij më të afërta, kongresistja Marjorie Taylor Greene, u kthye në kritike të ashpër për shkak të rezistencës së tij. Trump e ndryshoi qëndrimin të dielën, ndërsa ligjvënësit po përgatiteshin ta shtynin përpara nismën edhe pa mbështetjen e tij.

Sipas sondazhit, miratimi i përgjithshëm i Trump ka rënë me dy pikë që nga fillimi i nëntorit. Ai nisi mandatin e dytë me 47% mbështetje, por rënia prej nëntë pikësh që nga janari e afron atë me nivelet më të ulëta të popullaritetit gjatë mandatit të tij të parë, si edhe pranë niveleve minimale të paraardhësit demokrat Joe Biden. Ndër republikanët, miratimi për Trump ra nga 87% në 82%.

Rritja e çmimeve të konsumit mbetet sfida kryesore. Vetëm 26% e amerikanëve mendojnë se ai po e menaxhon mirë koston e jetesës, ndërsa 65% e kundërshtojnë plotësisht këtë aspekt. Politikëbërja e tij ekonomike, veçanërisht taksat e larta ndaj importeve, sipas ekspertëve, ka ndikuar në rritjen e çmimeve. Presioni publik e ka shtyrë Trump të ulë taksat e importit për disa produkte bazë.

Ndërkohë, vetëm 20% e amerikanëve – përfshirë 44% të republikanëve – miratojnë mënyrën si ai ka trajtuar çështjen Epstein. Sondazhi tregon se 70% e qytetarëve besojnë se qeveria po fsheh informacione për klientët e Epstein, çka rrit dyshimet dhe pakënaqësinë ndaj administratës.