Prokurorët francezë kërkojnë gjykimin e Lafarge për financim terrori

Prokurorët francezë kanë rekomanduar që prodhuesi i çimentos Lafarge të dalë në gjyq me akuzat për financim të terrorizmit për aktivitetet e tij të mëparshme në Siri.

Njësia e prokurorisë kundër terrorizmit të Francës (PNAT) dëshiron të vendosë kompaninë dhe nëntë nga ish-menaxherët e saj në bankën e të akuzuarve. Lafarge që nga viti 2015 është pjesë e konglomeratit zviceran të materialeve të ndërtimit Holcim. Ajo ka pranuar se në 2013 dhe 2014 ka paguar gati 13 milionë euro (14.2 milionë dollarë me normat aktuale) ndërmjetësve për të mbajtur në punë fabrikën e saj të çimentos siriane. Kjo ndodhi shumë kohë pasi firmat e tjera franceze ishin tërhequr nga vendi. Kompania pretendon se nuk kishte asnjë përgjegjësi për paratë që mbylleshin në duart e grupeve, të cilat dyshohet se përfshinin Shtetin Islamik.

Por në një dosje të PNAT-it, prokuroria kishte një pikëpamje ndryshe.

Kompania “ose synonte që fondet të përdoreshin tërësisht, apo pjesërisht, për qëllimin e kryerjes së akteve terroriste, ose ishte e vetëdijshme se kështu do të përdoreshin”, shkruajnë ata.

Lafarge tërhoqi stafin e saj të huaj nga zona siriane në vitin 2012, por mbajti punëtorët vendas deri në vitin 2014, kur vendi u evakuua pak përpara se Shteti Islamik ta merrte atë. Disa pjesëtarë të stafit sirian dhe OJQ, Sherpa dhe Qendra Evropiane për të Drejtat Kushtetuese dhe të Njeriut (ECCHR), ngritën një ankesë ligjore kundër Lafarge dhe gjyqësori francez hapi një hetim në 2017. Muajin e kaluar, gjykata më e lartë e apelit e Francës vendosi se Lafarge dhe ish-menaxherët mund të akuzohen për bashkëpunim në krime kundër njerëzimit për shpërblimet. Prokurorët janë ende duke i hetuar këto akuza.

Megjithatë, gjykata hodhi poshtë një akuzë të mëparshme për rrezikimin e jetës së të tjerëve, duke thënë se ligji francez nuk mund të zbatohej për sirianët që punojnë në fabrikë.