PAMJE/ Shpërthim me b*mbë në Monako, pl*goset rëndë biznesmeni ukrainas Vadim Yermalyev

Një shpërthim me eksploziv në hyrje të një rezidence pranë kufirit të Monakos me Francën ka tronditur mbrëmjen e së hënës zonën, duke lënë të plagosur rëndë biznesmenin ukrainas Vadim Yermalyev dhe persona të tjerë që ndodheshin në vendngjarje.

Ngjarja ka ndodhur kur një çantë e mbushur me eksploziv dhe copëza metalike ka shpërthyer në momentin kur Yermalyev dhe persona të tjerë po hynin në ndërtesë.

Autoritetet në Monako e kanë klasifikuar çështjen si tentativë vrasjeje dhe kanë përjashtuar deri tani motivin terrorist.

Sipas të dhënave nga hetimet dhe mediat ukrainase, gruaja e tij, Anna Yermalyeva, nuk ndodhej në vendngjarje, ndryshe nga raportimet e para. Ajo është shprehur se familja po kalon një periudhë të vështirë dhe po bashkëpunon me autoritetet hetimore.

E plagosura rëndë në ngjarje rezulton të jetë një tjetër person, identiteti i të cilit nuk është bërë publik. Ajo ka pësuar dëmtime të rënda, përfshirë humbjen e disa gjymtyrëve. Djali i saj 13-vjeçar është hedhur disa metra nga shpërthimi dhe ndodhet në spital jashtë rrezikut për jetën.

Hetimet po shqyrtojnë disa pista, përfshirë edhe mundësinë e lidhjes së ngjarjes me një skemë mashtrimi financiar me vlerë të madhe, që dyshohet të jetë zhvilluar përmes rrjeteve të call center-ave në Ukrainë dhe investimeve të rreme në kriptovaluta.

Autoritetet në Monako dhe Francë po kërkojnë një person të dyshuar, i cili është filmuar nga kamerat e sigurisë duke vendosur një pako pranë ndërtesës dhe më pas duke u larguar drejt territorit francez. Ngjarja ka sjellë reagime edhe nga autoritetet e Monakos, të cilat kanë bërë të ditur se po punohet për identifikimin dhe kapjen e autorëve.