HEGSETH S*LMON EUROPËN/ Sekretari Amerikan i Mbrojtjes krahason migracionin me pushtimin

Sekretari amerikan i Mbrojtjes, Pete Hegseth, kritikoi politikat europiane të migracionit gjatë ceremonive për përvjetorin e zbarkimit në Normandi. Ai e krahasoi ardhjen e emigrantëve me një “pushtim” të plazheve europiane dhe u bëri thirrje qeverive të veprojnë. Deklaratat vijnë në një kohë kur emigracioni mbetet një nga temat më të debatueshme në Europë dhe SHBA, teksa komentet e tij kanë shkaktuar reagime politike në të dy anët e Atlantikut.

Përkujtimi i një prej ngjarjeve më të rëndësishme të Luftës së Dytë Botërore u shndërrua në një platformë për debat mbi emigracionin.

Sekretari amerikan i Mbrojtjes, Pete Hegseth, përdori ceremoninë e përvjetorit të zbarkimit të aleatëve në Normandi për të kritikuar politikat europiane ndaj migracionit, duke i krahasuar flukset e emigrantëve me një pushtim të ri të brigjeve të kontinentit.

Duke folur 82 vjet pas kësaj dite, Hegseth deklaroi se sot plazhe të ndryshme europiane po “sulmohen” nga ideologji të rrezikshme dhe ngriti pyetjen se kur kryeqytetet europiane do të veprojnë ndaj asaj që ai e quajti “pushtim”.

Sipas tij, brigjet e Spanjës, Italisë, Greqisë dhe Bullgarisë po përballen me mbërritjen e vazhdueshme të emigrantëve përmes rrugëve detare.

Deklaratat e Hegseth pasqyrojnë qëndrimin e administratës së presidentit amerikan Donald Trump, e cila e ka vendosur luftën kundër emigracionit të paligjshëm në qendër të politikave të saj. Vetë Trump ka paralajmëruar më herët se migracioni i pakontrolluar mund të ketë pasoja serioze për të ardhmen e Europës.

Komentet e sekretarit amerikan vijnë ndërsa emigracioni mbetet një nga çështjet më të debatueshme në shumë vende europiane, ku partitë me qëndrime më të ashpra ndaj emigracionit po fitojnë terren në sondazhe dhe zgjedhje.

Në fjalimin e tij, Hegseth theksoi se liria e fituar me sakrifica nga brezi që luftoi në Normandi nuk duhet të merret si e mirëqenë.

Ai paralajmëroi se ruajtja e saj kërkon vendime të forta nga liderët e sotëm, duke argumentuar se sfidat e sigurisë dhe migracionit po ndryshojnë peizazhin politik dhe social të Europës.

Deklaratat e tij kanë rikthyer në qendër të debatit ndarjet e thella mes SHBA-së dhe disa vendeve europiane mbi mënyrën se si duhet menaxhuar emigracioni dhe siguria kufitare.