Gjyq i përmasave të mëdha në Francë/ Mjeku i akuzuar për ab*zime ndaj të miturve përballet me 20 vite burg

Joel Le Squarnec, një kirurg francez 74-vjeçar, i akuzuar për një nga rastet më të mëdha të pedofilisë në historinë e Francës, pritet të dënohet me 20 vjet burg pas përfundimit të gjyqit të tij në Vannes, Brittany. Gjatë procesit tremujor, ai u akuzua për 111 përdhunime dhe 189 sulme seksuale, kryesisht ndaj fëmijëve nën 15 vjeç, ndërmjet viteve 1989 dhe 2014, në dhjetëra spitale ku shumë viktima ishin nën anestezi ose në fazë rikuperimi.

Le Squarnec pranoi krimet në gjykatë, duke thënë se e kishte shfrytëzuar pozicionin e tij si kirurg për të sulmuar fëmijë dhe nuk kërkoi mëshirë nga gjykata. Vlerësimet psikiatrike e përshkruan atë si një person jashtëzakonisht të rrezikshëm. Rasti nxori në pah probleme serioze në sistemin francez të kujdesit shëndetësor, ku ai vazhdoi të punonte edhe pas dënimit të tij të parë në vitin 2005 për posedim materialesh abuzuese, përkundër paralajmërimeve nga FBI.

Drejtorët dhe mjekët e spitaleve dëshmuan se dyshimet ndaj Le Squarnec ishin injoruar ose nuk ishin hetuar si duhet. Drejtoresha e një spitali tha se e kishte punësuar kirurgun pavarësisht dënimit, për shkak të nevojës për specialistë dhe mungesës së udhëzimeve zyrtare për përjashtimin e tij. Ekspertë mjekësorë e konsideruan këtë rast një “fiasko mjekësore” dhe theksuan se sot do të ishin marrë masa shumë më të rrepta.

Le Squarnec po vuan aktualisht një dënim prej 15 vjetësh për katër përdhunime të të miturve dhe pritet të përballet me akuza të reja, pasi prokuroria ka hapur hetime për qindra ankesa të tjera. Jashtë sallës së gjykatës, viktimat dhe familjarët e tyre protestuan, duke kërkuar ngritjen e një komisioni hetimor dhe duke denoncuar heshtjen e institucioneve dhe shoqërisë që lejuan që abuzimet të vazhdonin.

Një nga viktimat, Manon Lemoine, e abuzuar në moshën 11-vjeçare, deklaroi se përgjegjësia nuk bie vetëm mbi Le Squarnec, por mbi një shoqëri që e krijoi dhe e lejoi atë të vazhdonte me krimet e tij për kaq shumë vite.