Araghchi akuzon SHBA-në për kr*me l*fte, ministri i Jashtëm iranian: S*lmet ndaj infrastrukturës energjetike shkelin të drejtën ndërkombëtare

Ministri i Jashtëm i Iranit, Abbas Araghchi, ka akuzuar Shtetet e Bashkuara për kryerjen e krimeve të luftës, duke i cilësuar sulmet ndaj infrastrukturës jetike energjetike të Iranit si shkelje të rëndë të së drejtës ndërkombëtare.

Në një deklaratë të publikuar në platformën Telegram, Araghchi tha se kërcënimet dhe veprimet ushtarake të SHBA-së zbulojnë, sipas tij, “qëllimin kriminal të aparatit qeveritar amerikan për të kryer krime të tmerrshme”.

Kryediplomati iranian theksoi se sulmet amerikane përbëjnë “një shkelje flagrante të Kartës së Kombeve të Bashkuara dhe parimeve themelore të së drejtës ndërkombëtare”.

Sipas Araghchit, sulmet ndaj infrastrukturës civile përbëjnë “krime të rënda ndërkombëtare”, në kundërshtim me parimet bazë të së drejtës penale ndërkombëtare, përfshirë katër Konventat e Gjenevës të vitit 1949.

Ai shtoi se të gjitha shtetet kanë detyrimin të hetojnë, ndjekin penalisht dhe ndëshkojnë autorët e krimeve të tilla.

Ministri iranian akuzoi gjithashtu zyrtarët amerikanë për përdorimin e “retorikës irracionale dhe kërcënimeve djallëzore”, duke pretenduar se armiqësia e Uashingtonit ndaj Teheranit buron nga vendosmëria e popullit iranian për të mbrojtur pavarësinë, të drejtat legjitime dhe dinjitetin e tij.

Në përfundim të deklaratës, Araghchi paralajmëroi se personat përgjegjës për këto sulme “nuk mund t’i shmangen përgjegjësisë ligjore duke pretenduar se kanë vepruar me urdhër të eprorëve të tyre”.