Sekuestrohen 3 milionë euro pasuri

Një pulari, apartamente në Shkodër dhe Velipojë dhe makinave prodhime të vitit të fundit, pasuri në vlerën e 3 milionë eurove, është sekuestruar në kuadër të operacionit “Goldfinger“.

Pasuria ishte e regjistruar në emër të 4 personave të arrestuar në Danimarkë për trafik droge po kështu edhe në emër të familjarëve të tyre dhe personave me të cilët kishin lidhje miqësore, informon policia e shtetit.

Te arrestuarit jane Eri Pelingu, Amando Docaj, Jetmir Kastrati dhe Defrim Eçi. 

Ata janë anëtarë të grupit kriminal që trafikonte kokainë dhe u arrestuan më 26 qershor 2019 në Danimarkë. Kapoja i tyre akuzohet se ishte Astrit Beqiri, ky i fundit u arrestua ne Shkoder 

Cfare u sekuestrua
Bazuar në vendimin e Gjykatës së Shkallës së Parë për Krimet e Rënda Tiranë, u vendos sekuestrimi mbi pasuritë

Një kompani private (pulari), me aktivitet në Shkodër, me vlerë investimi mbi 1,5 milionë euro;

10 apartemente banimi, në plazhin e Velipojës;

1 apartament banimi në Shkodër;

14 automjete të markave të ndryshme, prodhim i viteve të fundit.

"Këta persona janë pjesëtarë të një grupi të madh të strukturuar kriminal për trafikimin ndërkombëtar të lëndëve narkotike në vendet e BE-së dhe një pjesë të parave të përfituara nga ky aktivitet kriminal e kanë investuar në Shqipëri, kryesisht në vende bregdetare dhe qytete të mëdha" informon policia e shtetit.

Ketyre personave i ishin sekuestruar dhe pasuri te tjera me pare.

"Në vazhdim të operacionit “Goldfinger“, i zhvilluar më datë 26.06.2019, gjatë të cilit u sekuestruan 200 mijë euro, 10 milionë lekë, 7 automjete, 7 banesa dhe 1 biznes, operacion i koordinuar nga Europol-i dhe i drejtuar nga autoritetet e hetimit në Danimarkë, i shtrirë në disa shtete, si Danimarkë, Gjermani, Belgjikë, Hollandë, Suedi, Slloveni dhe Shqipëri, Drejtoria Hetimore Qëndrore, nën drejtimin e Prokurorisë pranë Gjykatës së Shkallës së Parë për Krimet e Rënda Tiranë ka vijuar hetimin pasuror për të sekuestruar të gjitha pasuritë e personave të arrestuar gjatë operacionit, të cilat rrjedhin nga aktiviteti kriminal i tyre"

Gjatë hetimeve për identifikimin e pasurive të tjera që kishin rrjedhur nga aktiviteti kriminal i shtetasve J. K., D. E., A.D. dhe E.P., të arrestuar në Danimarkë më datë 26.06.2019, për veprat penale “Grupi i strukturuar kriminal ”, “Trafik ndërkombëtar i lëndëve narkotike” dhe “Pastrimi i produkteve të veprës penale apo veprimtarisë kriminale", Drejtoria Hetimore Qëndrore, në bashkëpunim të ngushtë me Prokurorinë pranë Gjykatës së shkallës së Parë për Krimet e Rënda Tiranë, evidentoi një sërë pronash të tjera të këtyre personave dhe i kërkoi Gjykatës sekuestron përfundimtare në bazë të ligjitit antimafia.

Pronat e sekuestruara më datë 26.06.2019 dhe 29.10.2019, me vendim gjykate, i janë dorëzuar për administrim Agjencisë për Administrimin e Pasurive të Sekuestruara dhe të Konfiskuara pranë Ministrisë së Financave.

"Policia e Shtetit në bashkëpunim të ngushtë me Prokurorinë e Krimeve të Rënda Tiranë, po vijon punën për dokumentimin e plotë dhe zbardhjen e gjithë skemës së këtij grupi kriminal, personat e tjerë të përfshirë në këtë aktivitet kriminal, pasuritë e luajtshme dhe të paluajtshme të regjistruara në Shqipëri në emër të tyre, familjarëve apo personave me të cilët kanë lidhje miqësore dhe shoqërore. Hetimet vazhdojnë për të verifikuar pasuri të tjera të luajtshme apo të paluajtshme, si dhe llogari bankare të përfituara nga aktiviteti kriminale i këtyre personave" informon policia e shtetit.

Transportuan 1.6 ton kokaine

Sipas të dhënave të EUROPOL, grupi ka transportuar 1.6 ton kokainë në vendet e Bashkimit Europian. Policia dhe prokuroria e Krimeve të Rënda thonë se po vijon gjurmimin e pronave të dyshuara me burim veprimtarinë kriminale dhe personave të tjerë të dyshuar në këtë grup të strukturuar kriminal.