Digjet pallati dy katësh në Shtyllë të Korçës, 3 familje në borë (FOTO)

Një pallat në fshatin Shtyllë të Korçës është djegur plotësisht mbrëmjen e së dielës, duke lënë 14 banorë jashtë, në një kohë që reshjet e borës kanë nisur në zonë. Në kushtet e ftohjes së motit dhe pamundësisë për t’i rindërtuar vetë, ata kërkojnë ndihmën e Bashkisë së Korçës.

Shuarja e flakëve u bë nga zjarrëfikëset, të ndihmuara edhe nga reshjet e shiut.

Paraprakisht dyshohet se flakët janë shkaktuar nga oxhaku që mbanin ndezur banorët.

Ndërkohë që në fshat kanë nisur tashmë reshjet e dëborës, nga vatra e zjarrit që shkatërroi banesat del ende tym.

Aktualisht po diskutohet vetëm sigurimi i ushqimeve dhe vesh-mbathjeve për banorët e mbetur pa një çati mbi kokë, e më pas do të shihen mundësitë për banesa.

Për 14 banorët e asaj godine nuk ka mbetur më asgjë, vetëm shpresa se Bashkia nuk do i lërë të kalojnë dimrin jashtë.

Aktualisht, të trija familjet janë strehuar te të afërmit, por kjo nuk është zgjidhje afatgjatë.

Njoftimi i policisë

Më datë 28.11.2021, në mbrëmje, në fshatin Shtyllë, Korçë, ka rënë zjarr në një godinë/pallat ku janë djegur banesat e shtetasve F. I., V. I. dhe F. M. Për pasojë ka vetëm dëme materiale, të lënduar nuk ka. Nga veprimet e para hetimore, dyshohet se zjarri ka rënë aksidentalisht nga oxhaku.

Materialet do t'i kalojnë Prokurorisë së Rrethit Gjyqësor Korçë.