Atentat në Shkodër, plagoset më armë zjarri i afërmi i Bardhok Pllanajt që u vra 1 vit më parë

Një atentat me armë zjarri është regjistruar mbrëmjen e sotme në qytetin e Shkodrës

Ngjarja ka ndodhur në rrugën Shkodër - Han i Hotit, në zonën e Dobracit.

Mësohet se i plagosuri ka mbetur Dedë Pllanaj, një person i afërm i Bardhok Pllanaj, i njohur ndryshe si Kumbari i Shkodër i cili u vra një vit më parë.

Ora News mëson se i plagosur është dërguar në spitalin rajonal të Shkodrës dhe nuk dihet gjendja e tij shëndetësore.

Atentati ka ndodhur pak metra ku një vit më parë u ekzekutua kushëriri i tij.

Policia ka ngritur disa pika kontrolli në këtë zonë dhe në ndihmë pritet t'i vijnë pamjet e kamerave të sigurisë që ndodhen në këtë zonë si dhe po merren në pyetje dëshmitarët.

Autorët dyshohet se janë larguar në drejtim të paditur duke qenë se në zonë ka disa rrugëdalje.

Në vendin e ngjarjes kanë mbërritur edhe përfaqësues të Prokurorisë së Shkodrës.

“Rreth orës 22:10, në lagjen "Dobraç" Shkodër, në rrethana ende të paqarta, është plagosur me armë zjarri shtetasi D.P. 60 vjeç banues në fshatin Shtoj i Vjetër, i cili ndodhet në Spitalin Rajonal Shkodër nën kujdesin e mjekëve. Shërbimet e Policisë kanë ngritur pika kontrolli në hyrje - dalje të qytetit dhe vijon krehja e zonës me qëllim kapjen e autorit/ve." - njofton policia. 

Vrasja e Bardhok Pllanajt

"Kumbari" i Shkodrës Bardhok Pllanaj, u vra mbrëmjen e të dielës, 3 prill 2021 vetëm pak çaste pasi kishte vizituar nënën e sëmurë në spital dhe kishte dërguar bashkëshorten në shtëpi.

Vrasja ndodhi vetëm pak metra pasi viktima kishte dalë nga oborri i pallatit ku banonte.

Në vendin e ngjarjes janë gjetur gjithsej 79 gëzhoja arme kallashnikov, nga të vilat 77 në rrugën ku është qëlluar makina e 46-vjeçarit në një distancë rreth 100 metra.

Ndërsa dy gëzhoja të tjera janë gjetur në automjetin tip Volksvagen të përdorur nga autorët të cilët i vunë edhe flakën pas ngjarjes rreth 250 metër larg vendit të atentatit.