Sherr për mirëmbajtjen e makinës së blinduar/ Fitues i tenderit 3.5 mln lekë, operatori me ofertën më të shtrenjtë

Tenderi i qeverisë shqiptare për mirëmbajtjen e makinës së blinduar në pronësi të shtetit ka futur në konflikt kompanitë pjesëmarrëse. Dy subjektet e përjashtuara kanë bërë ankim në Agjencinë e Prokurimit Publik në lidhje me procedurën me fond rreth 3.5 milionë lekë. Ankuesit pretendojnë se kompania e shpallur fituese, e cila paraqiti ofertën më të shtrenjtë, nuk përmbush kriteret dhe nuk mund ta ofrojë shërbimin e kërkuar.

Qeveria shqiptare do të shpenzojë më shumë se 3 milionë e 499 mijë e 710 lekë për të realizuar servisin e automjetit të blinduar.

Prokurimi i hapur prej Drejtorisë së Shërbimeve Qeveritare ka hasur në ankesat e kompanive që kanë shprehur interes për të mbuluar kërkesat për këtë mjet.

Janë dy kompani që kanë kërkuar rishikimin e vendimit për përjashtimin nga procesi për shkak të kritereve.

Në fakt rezulton se në garë kanë marrë pjesë katër kompani dhe fitues ka rezultuar Power Industries me ofertën e dhënë 3 milionë e 490 mijë lekë, pra 9700 lekë se fondi limit i qeverisë.

Po ashtu dy nga kompanitë e skualifikuara prej garës kanë dhënë një ofertë më të ulët se fituesi, madje një prej tyre kërkoi vetëm 2 milion e 496 mije lekë.

Pavarësisht ankesave, autoriteti tenderues ka vazhduar me procedurat, që ka përfunduar më tej në dyert e prokurimeve publike.

Shkak për skualifikimin duket se është bërë mungesa e skemës së montimit për të gjitha pjesët e këmbimit si dhe skema e montimit të gomave.

Po ashtu pretendohet se dhe subjekti fitues nuk i plotëson kriteret e kualifikimit.

Megjithatë vetëm pas shqyrtimit të dokumenteve do të bëhet e ditur dhe fati se cila kompani do të marrë pësipër për të realizuar servisin e makinës së blinduar të qeverisë shqiptare.

Ky automjet përdoret në raste të veçanta për lëvizjen e personaliteteve të larta për arsye sigurie.