Qeveria miraton valën e re të shpronësimeve, mbi 51 milionë lekë për Korridorin 8, Parkun e Ulzës dhe infrastrukturën në Shkodër

Qeveria ka miratuar tre vendime të rëndësishme për shpronësimin e pasurive të paluajtshme private për interes publik.

Këto vendime i hapin rrugë realizimit të projekteve madhore në infrastrukturën rrugore dhe mbrojtjen e mjedisit në tre bashki të ndryshme të vendit: Elbasan, Mat dhe Shkodër.

Fondi total i vënë në dispozicion për kompensimin e pronarëve kalon vlerën e 51 milionë lekëve, ku peshën kryesore e mban ndërtimi i një prej loteve të Korridorit 8.

Më poshtë paraqiten detajet e secilit projekt sipas vendimeve të zbardhura të qeverisë.

Aksi rrugor Elbasan – Papër (Korridori 8)

Projekti me vlerën më të madhe të kompensimit është ai i studim-projektimit për aksin rrugor Elbasan – Lekaj, pjesë e Korridorit 8 (Loti I, faza I, II, III, Elbasan – Papër). Vlera e kompensimit është 46,241,507.4 lekë, e cila do të përballohet nga buxheti i shtetit.

Pasuritë e prekura janë tokë e llojit “arë”, “truall” dhe “ndërtesë”. Përfituesi i projektit është Autoriteti Rrugor Shqiptar (ARRSH).

Parku Natyror “Liqeni i Ulzës”

Në Bashkinë Mat, qeveria ka miratuar shpronësimet për realizimin e projektit që synon mbrojtjen dhe zhvillimin e Parkut Natyror “Liqeni i Ulzës” dhe zonës së mbrojtur përreth tij.

Vlera e kompensimit është 4,041,111.70 lekë, e përballuar nga “Fondi i shpronësimeve” në Bankën e Shqipërisë. Pasuritë e prekura janë kategori të ndryshme si “arë”, “truall”, “njësi” dhe “ndërtesë”.

Përfituesi i projektit është Ministria e Mjedisit, e cila do të mbulojë edhe shpenzimet procedurale.

Rruga “Marin Beçikemi” në Shkodër

Për përmirësimin e infrastrukturës rrugore lokale, është vendosur shpronësimi për rikonstruksionin e rrugës “Marin Beçikemi” në Bashkinë Shkodër.

Vlera e kompensimit është 859,611 lekë. Ndryshe nga dy projektet e mësipërme, ky fond do të mbulohet tërësisht nga buxheti i Bashkisë Shkodër. Pasuritë e prekura janë tokë e llojit “truall” dhe përfituesi i projektit është Bashkia Shkodër.

Procedurat, afatet dhe bllokimi i transaksioneve

Të treja vendimet hyjnë në fuqi menjëherë pas botimit në “Fletoren Zyrtare” dhe parashikojnë një afat 3-mujor për përfundimin e procesit të shpronësimit.

Qytetarët dhe pronarët e prekur nga këto projekte ftohen të paraqesin dokumentacionin justifikues pranë Agjencisë Shtetërore për Shpronësimin për projektet e Elbasanit dhe Ulzës dhe pranë Bashkisë Shkodër, në mënyrë që të nisin procedurat e likuidimit financiar.

Ndërkohë, qeveria ka urdhëruar Agjencinë Shtetërore të Kadastrës (ASHK) në zyrat përkatëse (Mat, Shkodër dhe Elbasan) që të pezullojnë çdo transaksion shitblerjeje me këto pasuri deri në hedhjen e gjurmës së projekteve në hartat kadastrale dhe kalimin zyrtar të pronësisë në favor të shtetit.