Profili i ADN së babait tradhtoi Florind Shabanin në vrasjen e Land Rexhepit

Një prej autorëve të vrasjes së ish-policit Roland Rexhepi në Elbasan është zbuluar nga krahasimi i ADN-së. I dyshuari Florind Shabani u kap fillimisht në Gjermani për një krim tjetër, por më pas të dhënat gjenetike të tij u sollën në Shqipëri ku policia i krahasoi me ato të babait. Pas përputhjes së profilit gjenetik prokuroria urdhëroi shpalljen në kërkim të autorit të dyshuar.

Një analizë ADN-je që i është bërë Ismail Shabanit, babait të Florind Shabanit, ka qenë vendimtare për zbardhjen e vrasjes së Roland Rexhepit, ngjarje kjo e ndodhur në 29 korrik 2009 në lagjen “Vullnetari” në Elbasan.

Florind Shabani, rezulton të ketë qenë në rolin e ndihmësit në këtë vrasje, ndërsa Gjermanët kanë qenë ata që sollën sinjalet e para, që ndihmuan më tej prokurorinë Shqiptare, në faktimin me provë shkencore të pjesëmarrjes së Shabanit në këtë vrasje.

Florind Shabani, prej 1 viti ndodhej në Gjermani, por në sistemin TIMS nuk rezultonte të kishte dalë nga Shqipëria.

Ai është arrestuar në Gjermani për tregtim droge dhe në vazhdën e procedurave, policia Gjermane ka sjellë në Policinë e Shtetit, një kërkesë për analizimin e ADN-së së këtij persona.

 Nga verifikimi i profilit të ADN-së i mbërritur nga Gjermania me profilet e ruajtura në laboratorin shkencor të policisë, rezultoi se i njëjti profil pështyme është gjendur në një maskë dhe bisht cigare, e sekuestruar nga prokuroria e Elbasanit në ngjarjen e vrasjes së Roland Rexhepit në 29 korrik 2009.

Prokurorët janë njohur me këtë rezultat, por nuk janë nxituar për shkak se kanë kërkuar të verifikojnë plotësisht këtë provë.

Në fillim të muajit shtator 2021, në prokurorinë e Elbasanit është thirrur për t'u marrë në pyetje Ismail Shabani, babai i Florind Shabanit.

Mes dëshmisë së tij në prokurori, Ismaili ka treguar se me djalin e tij ka pasur herë pas herë konflikte dhe dhunë në familje, por tashmë Florindi, ndodhej jashtë shtetit dhe jo në Elbasan.

Ismail Shabani, ka pranuar t'u japi një kampion pështyme hetuesve, ku profile gjenetik i tij do të mund të krahasohej me profilin gjenetik të djalit të mbërritur nga Gjermania.

Pas krahasimeve të kryera në laboratorin e policisë shkencore në Policinë e Shtetit, ka rezultuar se profilet gjenetike djalë-baba janë plotësisht të njëjta.

Kjo provë ka qenë vendimtare për grupin e hetimit, të cilët një dy ditë më parë kërkuan caktimin e masës së sigurisë “arrest në burg” në mungesë ndaj Florind Shabanit.

Aktualisht Shabani ndodhet në një burg të Gjermanisë, ku menjëherë sapo të përfundojë dënimin në këtë shtet, ai pritet të ekstradohet në Shqipëri, ku do përballet me akuzën e “Vrasjes me paramendim” të kryer në bashkëpunim.

Më herët për vrasjen e Roland Rexhepit ose “Doda” janë arrestuar Marjus Tafa dhe Armando Llakaj, të dy të dënuar me 24 dhe 23 vite burg.

Ndërsa 12 vite nga kjo ngjarje, prokuroria ka mundur të identifikojë dhe Florind Shabanin, si një prej bashkëpunëtorëve në këtë vrasje.

Ky krim i rëndë rezulton të jetë pasojë e përplasjes mes 2 familjeve, Çapja dhe Mema në Elbasan. Dy vite pas vrasjes së ish-efektivit të policisë Roland Rexhepit, në 30 dhjetor 2011, u vra edhe vëllai i tij, Ilir Rexhepi./OraNews/

EMISIONET