PD: Kriza energjetike krizë keqmenaxhimi, qeveria shkaktoi 40 mln euro dëm ekonomik. SPAK të hetojë

Partia Demokratike vijon të sjellë prova të asaj që e quan “krizë të korrupsionit dhe keqmenaxhimit të KESH dhe OSHEE” ndërsa vetë qeveria “krizë energjetike”

Deputetja e PD-së Ilda Dhori përmes një deklarate për median tha se pas kësaj krize, qeveria po përpiqet të fshehë përgjegjësitë e saj, për gjendjen ekonomike në të cilën ndodhet shumica e familjeve shqiptare dhe sipërmarrësit e ndershëm, që nuk konkurojnë dot në një ekonomi jo konkuruese, të përqëndruar në pak duar.

PD denoncon ato që i quan zgjedhje të papërgjegjshme që qeveria ka bërë vetëm midis muajve shtator dhe tetor.

“Sepse ndërkohë që flasin për krizë, u kanë shkaktuar qytetarëve shqiptarë një dëm ekonomik prej 40 milionë eurosh.

1)            10.6 milionë euro për blerjen e energjisë me çmimin më të lartë se bursa nga ana e OSHEE;

2)            12 milionë euro, duke përzgjedhur kompaninë me ofertën më të shtrenjtë për tunelin e Llogarasë;

3)            17.4 milionë euro, duke përzgjedhur ofertat më të shtrenjta për ndërtimin e Unazës së Madhe të Tiranës.

Partia Demokratike i bën thirrje SPAK të hetojë me përparësi këto shpërdorime, me taksat e shqiptarëve duke i dhënë fund pandëshkueshmërisë.

“Qytetarët e vendit më të varfër në Europë, nuk mund të paguajnë nga xhepat e tyre abuzimet e qeverisë më të korruptuar në Europë” mbyll deklaratën e saj deputetja demokrate, Ilda Dhori.