"Paraqet rrezik serioz për qëndrueshmërinë dhe sigurinë", ARRSH mbyll Urën e Milotit: Ja rrugët alternative

Autoriteti Rrugor Shqiptar, ARRSH përmes një postimi në "Facebook" ka reaguar në lidhje me mbylljen e Urës së Milotit për qarkullim.

ARRSH shkruan se kjo urë paraqet rrezik serioz për qëndrueshmërinë dhe sigurinë e kalimit mbi të. Sipas tyre ura ka dëmtime të mëdha në themelet mbështetëse.

Bëhet me dije se ura do të jetë e mbyllur derisa të vihet në zbatim një projekt urgjent i cili po hartohet për të ndërhyrë në këtë urë të dëmtuar.

ARRSH gjithashtu ka bërë thirrje që si rrugë alternative të përdoret rruga kryesore Lezhë-Milot dhe Rruga e Kombit.

Kjo urë sidomos gjatë sezonit të verës përdoret si rrugë për t'i shpëtuar trafikut të rënduar por vit pas viti ka dalë në pah gjendja aspak e mirë e kësaj ure.

Njoftimi i ARRSH: 

Ura auto-hekurudhore e Milotit, me një gjatësi prej 788 metrash, paraqet një rrezik serioz për qëndrueshmërinë dhe sigurinë e kalimit, si pasojë e:  dëmtimeve të konsiderueshme në themelet mbështetëse, erozionit të theksuar në bazament, për shkak të shfrytëzimit të pakontrolluar të zhavorrit të lumit, dhe gërryerjeve në të gjithë shtratin lumor.

Bazuar në ekspertizën teknike dhe duke marrë parasysh trafikun e rënduar, veçanërisht gjatë sezonit veror, është marrë vendimi për mbylljen e plotë të urës dhe ndërprerjen e qarkullimit, deri në përfundim të projekt ndërhyrjes emergjente që po hartohet nga Autoriteti Rrugor Shqiptar, në bashkëpunim me Universitetin Politeknik të Tiranës.

Kjo ndërhyrje do të zbatohet menjëherë në ditët në vijim. Ndërkohë, ndërtimi i urës krejtësisht të re është parashikuar nga ARRSH si pjesë e programit “100 Ura”, i cili realizohet me mbështetjen e Bankës Botërore.

Gjatë periudhës së ndërhyrjes, rekomandojmë përdorimin e këtyre rrugëve alternative: Rruga kryesore Lezhë -Milot dhe Rruga e Kombit. 

Të nderuar qytetarë dhe përdorues të rrugës, kjo ndërhyrje është thelbësore për të garantuar sigurinë e të gjithë komunitetit.

Ndërgjegjësohemi për vështirësitë dhe shqetësimet që mund të shkaktojë mbyllja e përkohshme e urës, por kjo masë është e domosdoshme për të shmangur rreziqe më të mëdha dhe për të siguruar një infrastrukturë të qëndrueshme dhe të sigurt në të ardhmen.