Gjykata liron nga paraburgimi dy të arrestuarit për djegien e flamujve serb. PD: Arrestimet politike

Dolën sot para gjykatës dy protestuesit që akuzohen për djegien e 4 flamujve serb në protestën e 20 dhjetorit 2021 para kryeministrisë do të hetohen në gjëndje të lirë.

Gjyqtari i Tiranës Artan Gjermeni e quajti të ligjshëm arrestimin por vendosi masën detyrim me paraqitje për të dy.

Astrit Cara dhe Besnik Balani të cilët u arrestuan një ditë më pas, 21 dhjetor, ishin prezentë në sallën e gjyqit ndërsa gjyqi u ndoq dhe nga deputetja Albana Vokshi.

Edhe prokuroria kërkoi masën e sigurisë detyrim me paraqitje.

Avokati Ledjo Nuraj tha se klientë te tij nuk kishin lidhje me veprën penale

“Djegja e flamurit nuk është vepër penale por shprehje e mendimit. Shtetasit kanë qenë në një proteste të ligjshme. Në Serbi personi që ka djegur flamurin shqiptar nuk është arrestuar  ndërsa ne këtu i arrestojmë” tha avokati në seancën e gjyqit duke kërkuar masë më të butë hetimi.

Ata u akuzuan per “Nxitja e urrejtjes ose grindjeve” dhe “Poshtërimi i Republikës dhe i simboleve të saj”.

Më pas gjyqtari pranoi kërkesën e të dy palëve dhe caktoi masën detyrim me paraqitje për dy të rinjtë.

Ndërkohë deputetët e PD-së i quajtën arrestime politike.